ပို့လဘား၊ မတ်လ ၆ ရက်၊ မိုင်းယုလေး
ရှမ်းမြောက် ကွတ်ခိုင်မြို့နယ် မိုင်းယုလေးကျေးရွာအုပ်စု ဟိုခိုရွာနေ အသက် ၁၈ နှစ်အရွယ်ရှိတဲ့ လွေးခမ်းလာဝ်က တရုတ်ပြည်ဘက်မှာ အလုပ်လုပ်ဖို့ သွားရာကနေ ၁လကြာတဲ့အထိ အဆက်အသွယ်မရပဲ ဒီနေ့ မတ်လ ၆ ရက်မှာတော့ အိမ်ပြန်ရောက်ရှိလာတာ ဖြစ်တယ်လို့ မိသားစုဝင်တစ်ဦးက ရွှေဖီမြေကို ပြောပါတယ်။
လွေးခမ်းလာဝ်ဟာ တရုတ်ပြည်မှာ အလုပ်သွားလုပ်ရာကနေ တရုတ်ရဲတွေ ဖမ်းဆီးတာခံရတာကြောင့် အိမ်နဲ့ အဆက်အသွယ်မရတော့တာ ဖြစ်တယ်လို့ ပြောပါတယ်။
မိသားစုဝင်တစ်ဦးက”သူတရုတ်စကားမတတ်ဘူးလေ။ ခရီးတွေလည်း သူမထွက်ဖူးဘူး။ အခုသူ့သူငယ်ချင်းတွေ ခေါ်လို့ မူဆယ်မှာ ထမင်းဆိုင်တခုလုပ်မယ်ဆိုပြီး သူ့ကိုခေါ်တာ။ အဲကြောင့်သူမူဆယ်ဘက်သွားလိုက်တာ။ ဟိုရောက်တော့ သူ့သူငယ်ချင်းက မူဆယ်မှာ လုပ်ရမှာ မဟုတ်ဘူး။ ရွှေလီမှာ လုပ်ရမှာဆိုပြီး သူသွားလိုက်တာ။ စက်ရုံတစ်ခုမှာ အလုပ်သွားလုပ်တာ။ ၈ ရက်လောက်ပဲ သူလုပ်ရသေးတယ်။ သူတို့သူဌေးက သူတို့ကို နေထိုင်ခွင့်လုပ်မယ်ဆိုပြီး ခေါ်သွားလိုက်တာ။ လမ်းမှာ ရဲတွေနဲ့တွေ့လို့ ရဲဖမ်းတာ ခံရတယ်။ သူတို့ မှတ်ပုံတင်အတုဆိုတော့လေ။ လောက်ပန်းကျတော့ မသိဘူး။ မှတ်ပုံတင်အတုဆိုတာ”လို့ ဆိုပါတယ်။
အဆိုပါအမျိုးသမီးငယ်ဟာ တရုတ်ရဲတွေက ၎င်းကို အချုပ်ထဲမှာ တစ်လနီးပါး ချုပ်ထားပြီး ဒီနေ့ မတ်လ ၆ ရက်မှာတော့ မူဆယ်မြို့ဘက်ကို ပြန်ပို့ပေးတာ ဖြစ်တယ်လို့ ဆိုပါတယ်။
ပြီးခဲ့တဲ့ ဇန်နဝါရီ ၂၉ ရက်က လွေးခမ်းလာဝ်ဟာ ဟိုခိုရွာကနေ မူဆယ်မြို့ကို တက်လာပြီးတော့ ရွှေလီမြို့ ခိုးပေါက်ထဲကို ပွဲစားကနေတဆင့် ဝင်သွားခဲ့ကြတာ ဖြစ်ပါတယ်။
