မိုင်းပန်ပျော်၊ ဖေဖော်ဝါရီ ၁၁ ရက်၊ တောင်ကြီး
ရှမ်းတောင် တောင်ကြီးမြို့နယ် တောင်နီကျေးရွာမှာရှိတဲ့ ပန့်ဆီဆိုင်တစ်ခု ဝါယာရှော့ဖြစ်ပြီး မီးလောင်မှု ဖြစ်ပွားခဲ့ပါတယ်။
ဖြစ်စဉ်ဟာ ဒီနေ့ ဖေဖော်ဝါရီ ၁၁ ရက် မနက် ၁၀ နာရီခွဲဝန်းကျင်မှာ တောင်နီရွာမှာရှိတဲ့ ဗိုလ်အောင်ဒင် ပန့်ဆီဆိုင်ဟာ ဝါယာရှော့ဖြစ်ပြီး မီးလောင်မှု ဖြစ်ပွားခဲ့တာလို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကိုပြောပါတယ်။
”ဗိုလ်အောင်ဒင် ဆီပန့်လေ။ မီးက ဝါယာရှော့ပေါ့။ ၁၀ နာရီ ၂၀ မိနစ်လောက်ကမီးလောင်တာ လူမထိဘူး”
မီးလောင်တာကို မီးသတ် တပ်ဖွဲ့က အချိန်မှီ မီးသတ်နိုင်ခဲ့တာကြောင့် အခြားအိမ်တွေဘက် ကူးစက်သွားတာ မရှိဘူးလို့ ဆိုပါတယ်။
မီးလောင်သွားတဲ့ ပန့်ဆီဆိုင်ဟာ တောင်ကြီး-ရွှေညောင်ပင်-ရပ်စောက်လမ်းမမှာရှိတဲ့ ဗိုလ်အောင်ဒင် ပန့်ဆီဆိုင် ဖြစ်ပါတယ်။
ရာသီဥတု အကူးအပြောင်းမှာ မီးတွေ အထူးသတိပြုကြဖို့ လူမှုကူညီရေးအသင်းတွေက သတိပေးထားပါတယ်။
