ပျားကြီး၊ ဇန်နဝါရီ ၁၀ ရက်၊ မန္တလေး
မန္တလေးတိုင်းက ယာဥ်ထိန်းရဲ ဝန်ထမ်းအိမ်ယာတစ်ခု ဒီနေ့ ဇန်နဝါရီ ၁၀ ရက် မနက်ပိုင်းမှာ မီးလောင်မှု ဖြစ်ပွားခဲ့တယ်လို့ ဒေသခံတွေက ပြောပါတယ်။
မနက် ၁၀ နာရီဝန်းကျင်မှာ ချမ်းအေးသာဇံမြို့နယ် ၂၉ လမ်းနဲ့ လမ်း ၃၀ ကြား ၆၈ လမ်းနဲ့ ၆၉ လမ်းကြားမှာရှိတဲ့ ယာဥ်ထိန်းရဲ ဝန်ထမ်းအိမ်ယာမှာ မီးလောင်ခဲ့တာ ဖြစ်ပါတယ်။
“၄ ခန်းတွဲ အိမ်ယာတွေ လောင်တာပေါ့။ လူထိခိုက်တာတော့ မကြားမိဘူး။ ဒီနားက တိုင်းအရံ ရဲရုံးတို့၊ ခရိုင်တရားရုံးတို့နဲ့ နီးတော့ မီးအကူးမခံဘူး။ အသည်းအသန် ငြိမ်းနေကြတာ” လို့ မီးလောင်မှုကို စောင့်ကြည့်ခဲ့တဲ့ ဒေသခံတစ်ဦးက ပြောပါတယ်။
မီးလောင်မှု ဖြစ်ပွားနေချိန်မှာ အနီးဝန်းကျင်က လမ်းမကြီးအားလုံးကို ပိတ်ဆို့လိုက်ပြီး မှတ်တမ်းဓာတ်ပုံ ရိုက်ကူးသူကိုလည်း ကိုယ်ထိလက်ရောက် ရိုက်နှက်ခဲ့တယ်လို့ မျက်မြင်တွေ့သူတွေက ပြောပါတယ်။
မီးလောင်မှုကြောင့် ၄ ခန်းတွဲ ဝန်ထမ်းအဆောင် ၂ ဆောင်၊ စုစုပေါင်း အခန်း ၈ ခန်း မီးလောင်ပျက်စီးခဲ့ပြီး မီးလောင်မှု ဖြစ်ပွားရတဲ့ အကြောင်းအရင်းကိုတော့ လတ်တလော မသိရသေးပါဘူး။
ယာဥ်ထိန်းရဲဟာ စစ်အာဏာသိမ်းပြီးနောက်ပိုင်း မန္တလေးမြို့ပေါ် နေ့စဥ်နဲ့အမျှ လူထုတွေအပေါ် အပြစ်ရှာ ဖမ်းဆီးပြီး ဒဏ်ငွေ အဆမတန် တောင်းယူလေ့ ရှိပေမဲ့ လက်ရှိ ဝန်ထမ်းလိုင်းခန်း မီးလောင်မှုမှာတော့ ချမ်းအေးသာဇံမြို့နယ်ထဲ စစ်ဆေးဖမ်းဆီးတာတွေ ညနေပိုင်းအထိ မရှိဘူးလို့ ဒေသခံတွေက ပြောဆိုပါတယ်။
