မိုင်းပန်ပျော်၊ ဧပြီ ၂၂ ရက်၊ သီပေါ
တအာင်းတပ်မတော် ထိန်းချုပ်ထားတဲ့ ရှမ်းမြောက် သီပေါမြို့နယ်က အမျိုးသားတစ်ဦး ဆေးကြောင်ပြီး မိခင်ဖြစ်သူကို သတ်ဖြတ်ခဲ့တယ်လို့ သိရပါတယ်။
ဧပြီ ၁၁ ရက် ည ၇ နာရီဝန်းကျင်မှာ သီပေါမြို့နယ် တုံစင့်ရွာမှာ နေထိုင်တဲ့ အမျိုးသားတစ်ဦးက ဆေးကြောင်ပြီး အသက် ၆၀ ကျော်အရွယ် မိခင်ကို သတ်ဖြတ်ခဲ့တယ်လို့ ဖြစ်စဉ်သိရှိသူ အမျိုးသားတစ်ဦးက ရွှေဖီမြေကို ပြောပါတယ်။
“သူ့အမေက ဘုရားရှိခိုးနေတဲ့အချိန် သူက အခန်းထဲ ဝင်ပြီး ရွှေငွေတွေကို ခိုးဖို့ လုပ်နေတာ။ သူ့အမေ မြင်ပြီးတော့ သူ့ကို လှမ်းအော်တာ။ အဲဒါကို သူ့အမေရဲ့ လည်ပင်းကိုညစ်ပြီး တွန်းချတော့ နောက်စိကို ထိပြီး နားထဲ သွေးထွက်ပြီး သေသွားတယ်”
ကျူးလွန်သူ အမျိုးသားဟာ အသက် ၃၃ နှစ်အရွယ် ငြိမ်းချမ်းအောင်ဆိုသူဖြစ်ပြီး ဖခင်ဖြစ်သူက ရဲစခန်းမှာ အမှုဖွင့် တိုင်ကြားထားတာကြောင့် စစ်ဆေးမှု ပြုလုပ်နေတယ်လို့ ၎င်းက ဆက်ပြောပါတယ်။
ပြီးခဲ့တဲ့ ဖေဖော်ဝါရီ ၂၄ ရက်မှာလည်း သီပေါမြို့နယ် စံဖိတ်ရွာမှာ အမျိုးသားတစ်ဦးက သူ့ရဲ့မိသားစုဝင်ကို ဓားနဲ့ခုတ်လို့ ၂ ဦး သေဆုံးပြီး ၂ ဦး ဒဏ်ရာရတဲ့ဖြစ်စဉ် ဖြစ်ပွားခဲ့ဖူးပါတယ်။
