အိုက်ပွီး၊ ဧပြီ ၂၅ ရက်၊ ကျောက်ဖြူ
ယာယီ ပစ်ခတ်တိုက်ခိုက်မှု ရပ်စဲရေး သက်တမ်း တိုးမြှင့်ထားတဲ့ စစ်ကောင်စီတပ်က ရခိုင်ပြည်နယ် ကျောက်ဖြူမြို့နယ်ကို အသေခံဒရုန်းနဲ့ ဗုံးကြဲတိုက်ခိုက်လို့ စစ်ဘေးရှောင်အမျိုးသမီး သေဆုံးခဲ့တယ်လို့ ဒေသခံတွေက ရွှေဖီမြေသို့ ပြောပါတယ်။
ကျောက်ဖြူမြို့နယ် ရေနံတောင်ရွာကို စစ်တပ်က မြေပြင်မှာ တိုက်ပွဲမရှိဘဲ မနေ့ ဧပြီ ၂၄ ရက် နေ့လယ်ကစပြီး ဒရုန်းနဲ့လေကြောင်း ဗုံးကြဲတိုက်ခိုက်မှု ၃ ကြိမ်ထက်မနည်း ပြုလုပ်ခဲ့ရာ အရပ်သား ထိခိုက်သေဆုံးခဲ့တာပဲ ဖြစ်ပါတယ်။
“နေ့လယ် ၂ နာရီလောက်ကစပြီး ဒရုန်းနဲ့ ဗုံးကြဲတိုက်ခိုက်တာပါ။ စုစုပေါင်း သုံးကြိမ်လောက် တိုက်ခိုက်သွားတယ်။ ရွာထဲမှာက ဘာတိုက်ပွဲမှမရှိဘဲ အရပ်သားတွေ ပုံမှန်အတိုင်းပါပဲ။ ထူးခြားတာလည်း မရှိဘူး။ အရပ်သားတွေချည်းနေတော့ အရပ်သားတွေပဲ ထိခိုက်တာပေါ့” လို့ ကျောက်ဖြူမြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
သေဆုံးသူဟာ ရေနံတောင်ရွာမှာ စစ်ဘေးရှောင်နေတဲ့ ကုလဘာရွာက အသက် ၆၂ နှစ်အရွယ် ဒေါ်မယဥ္နုဖြစ်ပြီး အသက် ၇၆ နှစ်အရွယ် ဦးလှစံလည်း ထိခိုက်ဒဏ်ရာ ရရှိခဲ့တယ်လို့ သူက ဆက်ပြောပါတယ်။
ဒါ့အပြင် နေအိမ်နဲ့ စျေးဆိုင်တချို့လည်း ဗုံးစ ထိမှန်ပြီး မီးလောင်ပျက်စီးသွားပါတယ်။
စစ်တပ်က ဒီရက်ပိုင်း ၎င်းတို့ လက်လွှတ်ဆုံးရှုံးလိုက်ရတဲ့ ကျေးရွာတွေကို ပြန်လည်ရရှိဖို့အတွက် မြေပြင်ကနေ စစ်ကြောင်း ထိုးလာသလို ဒရုန်း၊ လက်နက်ကြီးကျည်နဲ့လည်း ပစ်ခတ်တိုက်ခိုက်နေတယ်လို့ သိရပါတယ်။
“ရေတပ်ဌာနချုပ်အနီးတွေ၊ ကျောက်ဖြူ ရဲတပ်ရင်းအနီးတွေဆို ပြီးခဲ့တဲ့ လတွေက အေအေ ထိုးစစ်ဆင်လို့ လက်လွှတ်လိုက်ရတဲ့နေရာတွေ၊ စခန်းတွေ ရှိတယ်။ အခုအဲနေရာတွေက ပြန်ရဖို့ စစ်ကြောင်း ထိုးတယ်။ လက်နက်ကြီးတွေ ပစ်တယ်။ ဒရုန်းတွေ တိုက်ခိုက်တယ်။ တိုက်ပွဲက ကြီးကြီးမားမားမရှိပေမဲ့ လက်နက်ကြီးနဲ့ ဒရုန်းကြောင့် အရပ်သား ထိခိုက်သေဆုံးမှုတွေက ရှိတယ်” လို့ ကျောက်ဖြူမြို့နယ်မှ စစ်ရေးသတင်းအရင်းအမြစ်က ရွှေဖီမြေသို့ ပြောပါတယ်။
စစ်ကောင်စီက ယာယီ ပစ်ခတ်တိုက်ခိုက်မှုရပ်စဲရေးကာလ ဧပြီ ၂ ရက်မှ ၂၂ ရက်အထိ ကြောညာပေမဲ့ အဲဒီ ရက် ၂၀ ကာလအတွင်း ရခိုင်ပြည်နယ်မှာ လေကြောင်းဗုံးကြဲမှုအပါအဝင် ပစ်ခတ်တိုက်ခိုက်မှု ၄၀၉ ကြိမ် ရှိခဲ့တယ်လို့ AA ရဲ့ လူသားချင်းစာနာထောက်ပံ့ရေးရုံး- HDCO က မနေ့ ဧပြီ ၂၄ ရက်မှာ ထုတ်ပြန်ထားပါတယ်။
