ရွှေဖီမြေ၊ ဖေဖော်ဝါရီ ၁၀ ရက်၊ ကျောက်ကြီး
ကရင်အမျိုးသားအစည်းအရုံး- KNU/KNLA ထိန်းချုပ်တဲ့ ပဲခူးတိုင်း ကျောက်ကြီးမြို့နယ် (လယ်ဒို)ထဲ စစ်ကောင်စီတပ် ပစ်ခတ်တဲ့ လက်နက်ကြီးနဲ့ ဒရုန်းကြောင့် အရပ်သားတစ်ဦး သေဆုံးခဲ့ပြီး ၄ ဦး ဒဏ်ရာ ရတာအပြင် နေအိမ် ၂၄ လုံးလည်း ထိမှန်ပျက်စီးခဲ့တယ်လို့ KNU က မနေ့ ဖေဖော်ဝါရီ ၉ ရက်မှာ သတင်းထုတ်ပြန်ထားပါတယ်။
မနေ့ နေ့လယ် ၁၂ နာရီမှာ စစ်တပ်က ဂျက်ဖိုက်တာနဲ့ ပေါင် ၅၀၀ ဗုံး ၁ လုံး ဗုံးကြဲတိုက်ခိုက်ခဲ့တာကြောင့် ဘီးလင်းမြို့နယ် မင်းစောကျေးရွာအုပ်စု တဂေးလောင်းရွာ (ထီးဆိဘောရွာ)ဘုန်းကြီးကျောင်းဝန်းထဲ ကျရောက်ပေါက်ကွဲခဲ့တာ ဖြစ်ပါတယ်။
တိုက်ခိုက်မှုကြောင့် ဘုရားစေတီ၊ သာသနာအဆောက်အအုံနဲ့ စုစုပေါင်း နေအိမ် ၁၇ လုံးလည်း ထိခိုက်ပျက်စီးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဖေဖော်ဝါရီ ၃ ရက် ညနေ ၆ နာရီမှာ ပိန်းဇလုပ်အခြေစိုက် စစ်ကောင်စီ ခလရ ၂၆၄ တပ်ရင်းက ဒရုန်းနဲ့ ဗုံး ၃ လုံး ပစ်ချခဲ့တာကြောင့် နေအိမ် ၃ လုံး ထိခိုက်ပျက်စီးခဲ့တယ်လို့ ဆိုပါတယ်။
အလားတူ ဖေဖော်ဝါရီ ၅ ရက်မှာ ခလရ ၂၆၄ တပ်ရင်းကနေ ငဖယ်အင်းရွာထဲ ၁၂၀ မမ လက်နက်ကြီးနဲ့ ပစ်ခတ်ခဲ့လို့ နော်ဒေးပလာဆိုသူ ဒဏ်ရာ ရခဲ့ပါတယ်။
ပြီးခဲ့တဲ့ ဖေဖော်ဝါရီ ၅ ရက်မှာ တောင်ခင်၊ ကြိတ်ကွင်းနဲ့ ဘုရားငုတ်တိုရွာကို စစ်တပ်က ဒရုန်းဗုံး ကြဲချခဲ့တာကြောင့် နေအိမ် ၄ လုံး ထိခိုက်ပျက်စီးခဲ့တယ်လို့ ဆိုပါတယ်။
ဒါ့အပြင် အသက် ၃၀ အရွယ် နော်ဝါဝါထွန်း ထိခိုက်သေဆုံးခဲ့ပြီး ကညင်ကျွန်းရွာထဲကိုလည်း ဒရုန်းနဲ့ ထပ်မံ ဗုံးပစ်ခတ်ခဲ့တာကြောင့် ဒေါ်ခိုင်ဝဋလွင် (၃၈ နှစ်)၊ ဦးသိန်းသိန်း (၆၂ နှစ်)နဲ့ ဦးဇင်မျိုးလှိုင် (၃၈ နှစ်)တို့ ဒဏ်ရာ ရခဲ့တယ်လို့ ထုတ်ပြန်ထားပါတယ်။
ပြီးခဲ့တဲ့ ဇန်နဝါရီ ၃၁ ရက်က သေခိုဆယ်ဒဲရွာထဲ စစ်တပ်က တိုက်လေယာဉ် ၃ စီးနဲ့ ဗုံး ၂ ကြိမ် ကြဲချခဲ့သလို စက်သေနတ်နဲ့ပါ ပစ်ခတ်ခဲ့လို့ အသက် ၁၆ နှစ်နဲ့ ၂ နှစ်အရွယ်ကလေးငယ်အပါအဝင် ၄ ဦး ဒဏ်ရာ ရခဲ့ဖူးပါတယ်။
