မြတ်နိုး၊ ဩဂုတ် ၂၉ ရက်
ကချင်ပြည်နယ် ဝိုင်းမော်မြို့နယ် လုမြန်နဲ့ အနီးဝန်းကျင်မှာ ဩဂုတ်လ ၂၇ ရက်နေ့က တိုက်ပွဲ ပြင်းထန်ခဲ့ပြီး စစ်ကောင်စီက ဘုရားကျောင်းကိုလည်း လေကြောင်းနဲ့ ဗုံးကြဲခဲ့ကြောင်း ရှေ့တန်းသတင်းအရင်းမြစ်တွေဆီက သိရပါတယ်။
“လုမြန်အနီး မုတ်ကျိတ်ရွာက KBC ဘုရားကျောင်းမှာ စခန်းချနေတဲ့ စစ်ကောင်စီတွေကို ဩဂုတ်လ ၂၇ ရက်နေ့က သွားတိုက်တာ။ စစ်ကောင်စီဘက်က ဗျူဟာမှူးနဲ့ အရာရှိ သုံးယောက်လောက် ထိတယ်” လို့ ရှေ့တန်းနဲ့ နီးစပ်သူတစ်ဦးက ပြောပါတယ်။
စစ်ကောင်စီတပ်ဖွဲ့က အဲဒီဘုရားကျောင်းမှာ စခန်းချနေထိုင်တာ ကြာပြီဖြစ်ပြီး ဩဂုတ်လ ၂၇ ရက် ညနေပိုင်းမှာတော့ စစ်ကောင်စီတပ်ဖွဲ့တွေကို ရှင်းထုတ်လိုက်နိုင်ပြီလို့ သူက ပြောပါတယ်။
“ဘုရားကျောင်းမှာ နေထိုင်နေတဲ့ စစ်ကောင်စီတွေကို မောင်းထုတ်လိုက်တာ မှန်တယ်။ ဗျူဟာမှူးလဲ တစ်ယောက်ကျသွားတယ်။ ဒါပေမယ့် အဲဒီဗျူဟာမှူးအစား မပခ က တစ်ယောက် ချက်ချင်း ပြန်အစားထိုးလိုက်တယ်လို့ သိရတယ်” လို့ နောက်ထပ် ရှေ့တန်းသတင်းအရင်းမြစ် တစ်ဦးက ပြောပါတယ်။
စစ်ကောင်စီဘက်က အဲဒီဘုရားကျောင်းကနေ ဆုတ်ခွာထွက်သွားပြီးနောက် လေကြောင်းနဲ့ လာရောက် ဗုံးကြဲဖျက်ဆီးခဲ့တယ်လို့ သူက ပြောပါတယ်။
တိုက်ပွဲပြင်းထန်နေချိန် မြစ်ကြီးနားဘက်က သံချပ်ကာကားတွေနဲ့လည်း သွားရောက် ပစ်ကူခဲ့တာ ရှိပေမယ့် KIA နဲ့ ပူးပေါင်းတပ်ဖွဲ့ဘက်က ရှေ့တိုးနိုင်ခဲ့ပြီး စစ်ကောင်စီ သုံ့ပန်း တချို့လည်း ဖမ်းမိခဲ့တယ်လို့ ဆိုပါတယ်။
ဝိုင်းမော်မြို့နယ်အတွင်းမှာတော့ မြောက်ပိုင်းတိုင်းစစ်ဌာနချုပ် (မပခ) တိုက်ရိုက်ကွပ်ကဲတဲ့ ခြေလျင်တပ်ရင်း ခလရ – ၅၈ တပ်စခန်း ကျန်ရှိနေသေးတယ်လို့ ရှေ့တန်းသတင်းအရင်းအမြစ်တွေက ပြောပါတယ်။
လက်ရှိ ဝိုင်းမော်မြို့နယ်၊ ဖားကန့်မြို့နယ်နဲ့ ဗန်းမော်မြို့နယ်တွေမှာ စစ်ကောင်စီတပ်နဲ့ KIA ပူးပေါင်းတပ်ဖွဲ့တို့အကြား တိုက်ပွဲတွေ ဖြစ်ပွားနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
