အိုက်ပွီး၊ မတ်လ ၄ရက်၊ ငဖဲ
မကွေးတိုင်း၊ ငဖဲမြို့နယ်၊ အမ်း – ပဒါန်း ကားလမ်းပေါ်က စစ်ကောင်စီတပ်ရဲ့ နတ်ရေကန် ဗျူဟာကုန်းကို အာရက္ခတပ်တော်-AAနဲ့ တော်လှန်ရေးပူပေါင်းတပ်တို့ ထိုးစစ်ဆင်တိုက်ခိုက်မှုဟာ တိုက်ပွဲပြင်းထန်လာပြီး စစ်ကောင်စီ လေကြောင်း ဗုံးကြဲတိုက်ခိုက်လို့ ချင်းအမျိုးသားတစ်ဦး သေဆုံးခဲ့ပါတယ်။
AA နဲ့ တော်လှန်ရေးပူးပေါင်းတပ်တို့ နတ်ရေကန် ဗျူဟာကုန်း ထိုးစစ်ဆင်တိုက်ခိုက်မှုဟာ တဖြည်းဖြည်းနဲ့ နတ်ရေကန်ဗျူဟာကုန်းကို နီးကပ်လာပြီး ကာကင်းစခန်းတွေမှာ တိုက်ပွဲတွေပြင်းထန်နေကာ စစ်ကောင်စီတပ်က လက်နက်ကြီးကျည်တွေ၊ လေကြောင်း၊ ဒရုန်းတို့နဲ့ပါ ခုခံတိုက်ခိုက်နေတယ်လို့ သိရပါတယ်။
“နတ်ရေကန် ဗျူဟာကုန်းနဲ့ အတော်နီးကပ်နေပြီ။ အဲဒါကြောင့် နတ်ရေကန် တောင်ပေါ်ကနေ ဒရုန်းတွေ၊ လက်နက်ကြီးကျည်တွေ နေ့ညမပြတ်ပဲ တောက်လျှောက် ပစ်ကူပေးနေတယ်။ တိုက်ပွဲတွေနည်းနည်းပြင်းထန်လာရင် လေယာဥ်နဲ့ ဗုံးကြဲတိုက်ခိုက်နေတယ်။ အခု နတ်ရေကန်ဗျူဟာကုန်းကို တော်လှန်ရေးတပ်တွေက ပိတ်ဆို့ပြီး တိုက်ခိုက်နေတယ်။ စစ်ကောင်စီတပ်ကို လက်နက်ချဖို့လည်း ပြောဆိုထားတာရှိတယ်။ လက်နက်ချတာတွေမရှိပေမဲ့ လက်နက်ခဲယမ်းနဲ့ထွက်ပြေးနေတဲ့ စစ်ကောင်စီတပ်ဖွဲ့ဝင်တွေက အတော်ရှိတယ်။ ထွက်ပြေးတဲ့စစ်ကောင်စီတပ်ဖွဲ့ဝင်တွေကို တော်လှန်ရေးတပ်ဖွဲ့တွေက ဖမ်းမိတာတွေရှိတယ်။”လို့ တော်လှန်ရေးတပ်တွေနဲ့နီးစပ်တဲ့ စစ်ရေးအခြေအနေကိုသိရှိသူ ဒေသခံအမျိုးသားတစ်ဦးက ရွှေဖီမြေသို့ ပြောပါတယ်။
မနေ့ မတ်လ ၃ ရက်နေ့ မနက် ၉ နာရီအချိန်ခန့်က စစ်ကောင်စီတပ်ရဲ့ ဒရုန်းနဲ့ ဂျက်ဖိုက်တာတို့နဲ လေကြောင်း ဗုံးကြဲတိုက်ခိုက်ခဲ့တာကြောင့် နတ်ရေကန် ဗျူဟာကုန်း အောက်ဘက်ရှိ လင်းတဲကျေးရွာမှာ ကျရောက်ပေါက်ကွဲလို့ ချင်းအမျိုးသားတစ်ဦး သေဆုံးခဲ့ပြီး လူနေအိမ် ၄လုံးထက်မနည်း ထိခိုက်ပျက်စီးသွားပါတယ်။
“ဒရုန်းက နတ်ရေကန်တောင်ပေါ်ကပါ။ လေယာဥ်နဲ့လည်း ဗုံးကြဲတယ်။ ဘယ်ကဗုံးသီးမှန်း မသိဘူး။ ရွာထဲမှာ ဗုံးသီး ငါးလုံးလောက် ကျပေါက်ကွဲ တယ်။ အမျိုးသားတစ်ဦး ပွဲချင်းပြီး သေဆုံးတယ်။ နေအိမ် လေးလုံးလောက် မီးလောင်တယ်။ အခုရက်ပိုင်းထဲ လေကြောင်းတွေ အမြဲလာတယ်။ ဒရုန်းတွေလည်း ရွာအနီးအနားဝန်းကျင်မှာ ဗုံးကြဲတိုက်ခိုက်တာရှိတယ်။ တိုက်ပွဲတွေကလည်း ရက်ဆက်ဖြစ်နေပါတယ်။”လို့ ငဖဲမြို့နယ် ဒေသခံချင်းအမျိုးသားတစ်ဦးက ရွှေဖီမြေသို့ ပြောပါတယ်။
သေဆုံးသူဟာ အသက် ၂၇ နှစ်အရွယ် ဆလိုင်းသိန်းဝင်းမောင်ဖြစ်ပါတယ်။
ပြီးခဲ့တဲ့ ဖေဖော်ဝါရီလ ၂၄ ရက်နေ့ကလည်း စစ်ကောင်စီ လေကြောင်း ဗုံးကြဲတိုက်ခိုက်လို့ လင်းတဲကျေးရွာက ချင်းမျိုးသားနှစ်သေဆုံးပြီး ကလေးအပါအဝင် ၈ ဦးထိခိုက်ဒဏ်ရာရရှိကာ ဘုန်းကြီးကျောင်းတစ်ကျောင်း ပျက်စီးသွားပါတယ်။
