လွေးလာဝ်ဇာရ်၊ မတ်လ၊ ၉ ရက်
တအာင်းတပ် TNLA ထိန်းချုပ်ထားတဲ့ ရှမ်းမြောက် ကွတ်ခိုင်မြို့နယ် မိုင်းယုလေးရွာမှာ မြေစာပြိုကျမှုကြောင့် ကလေးတစ်ဦး သေဆုံးသွားတယ်လို့ ရွှေဖီမြေက စုံစမ်းသိရှိရပါတယ်။
ဖြစ်စဉ်က မနေ့ မတ်လ ၈ ရက် မနက် ၁၁ နာရီဝန်းကျင်မှာဖြစ်ပွားခဲ့ပြီး တူးထားတဲ့ မြေစာပုံပြိုကျလို့ အသက် ၁၃ နှစ်အရွယ် မိုင်းညီဟိန်းဆိုသူ သေဆုံးခဲ့တယ်လို့ ဆိုပါတယ်။
မိုင်းယုဒေသခံ အမျိုးသမီးတစ်ဦးက “အရင်က ဘတ်ဖိုးကားနဲ့ တူးထားတဲ့မြေစာတွေပါ။ ဒါပေမယ့် အခုက အဲနေရာ သူတို့မလုပ်တော့ဘူး။ တခြားနေရာ ရွှေ့ထားတယ်။ သူကအဲမြေစာအောက် ဝင်သွားတော့ ကျောက်ခဲတစ်လုံးက သူပေါ်ဖိပြီး သေသွားတယ်။ သူ့အပေါ်ကျတဲ့ကျောက်ခဲက ကြီးတယ်” လို့ ပြောပါတယ်။
မြေစာပုံဖိထားတဲ့ မိုင်းညီဟန်းကို ဆေးရုံမှာ ဆေးကုသဖို့ခေါ်ဆောင်သွားခဲ့ပေမယ့် လမ်းတစ်ဝက်မှာတင် သေဆုံးသွားခဲ့တယ်လို့ နောက်ထပ် မိုင်းယုဒေသခံ အမျိုးသားတစ်ဦးက ဆိုပါတယ်။
“မြေစာပြိုတဲ့အချိန်မှာ သူမသေသေးဘူး။ သူ့အပေါ်ဖိထားတဲ့ အဲမြေစာတွေရော ကျောက်ခဲတွေရော ဘတ်ဖိုးကားနဲ့ ဖယ်ပေးနေတာ။ ဆေးရုံခေါ်သွားတာ။ လမ်းမှာ သေသွားတာ” လို့ ဆိုပါတယ်။
မိုင်းယုလေးနဲ့ နမ့်ဖတ်ကာကြားမှာရှိတဲ့ နမ့်မော ရေချောင်းဟာ ဒေသခံတွေ ဟင်းသီးဟင်းရွက် ဆေးကြောဖို့၊ အဝတ်အစား လျှော်ဖို့နဲ့ ရေချိုးဖို့ အဓိက အသုံးပြုကြပြီး လက်ရှိမှာတော့ ရွှေအလွန်အကျွံ တူးဖော်မှုကြောင့် ရေနောက်ပြီး သုံးလို့မရတဲ့အခြေအနေနဲ့ ရင်ဆိုင်နေရကြောင်း အသုံးပြုဖို့ရေ အခက်အခဲ ကြုံနေရတယ်လို့ ဒေသခံတွေက ရွှေဖီမြေကို ပြောဆိုထားဖူးပါတယ်။
