ပျားကြီး၊ ဇူလိုင် ၁၈ ရက်၊ မန္တလေး
ရစ်ချ်တာစကေး ၅.၄ အဆင့်ရှိတဲ့ ငလျင်တစ်ခု ထပ်မံ လှုပ်ခတ်ခဲ့တာကြောင့် မန္တလေးမြို့က ငလျင်ဒဏ် ခံခဲ့ရတဲ့ အဆောက်အဦးတချို့ ပြိုကျမှု ရှိခဲ့တယ်လို့ ဒေသခံတွေက ပြောပါတယ်။
ဒီနေ့ညနေ ၄ နာရီက လှုပ်ခတ်ချိန် ၁၀ စက္ကန့်ဝန်းကျင် ကြာမြင့်တဲ့ ငလျင်လှုပ်ခတ်မှုတစ်ခု ဖြစ်ပွားခဲ့တာဖြစ်ပြီး မတ်လ ၂၈ ရက်က စစ်ကိုင်းငလျင် လှုပ်ခတ်မှုဖြစ်စဉ်အပြီး ၁၁၁ ရက်မြောက်နေ့မှာ အင်အား အသင့်အတင့်ရှိတဲ့ ငလျင်တစ်ခု ပြန်လည်လှုပ်ခတ်ခဲ့တာပဲ ဖြစ်ပါတယ်။
“အစက ဖြည်းဖြည်းလေး လှုပ်တာ။ ပြီးမှ တဒုန်းဒုန်းနဲ့ ဆက်တိုက် လှုပ်တော့တာပဲ။ အိမ်ပြင်ရောက်တော့ အိမ်နားက ဖြိုလက်စတိုက်က အောက်ထပ်တစ်ခုလုံး ကျွံကျပြန်ရော။ ဘယ်ပြေးရမှန်းကို မသိတော့ဘူး။ တော်တော်ဆိုးတယ်” လို့ အောင်မြေသာစံမြို့နယ်မှ ဒေသခံအမျိုးသမီးတစ်ဦးက ပြောပါတယ်။
ငလျင်လှုပ်ခတ်မှုကြောင့် အရင်ငလျင်ဒဏ်သင့် အဆောက်အဦးတချို့ ပြိုကျမှု ရှိခဲ့ပေမဲ့ လူထိခိုက်မှု တစုံတရာ မရှိသေးဘူးလို့ ဒေသခံ ပရဟိတသမားတစ်ဦးက ပြောဆိုပါတယ်။
မတ်လ ၂၈ ရက်က လှုပ်ခတ်ခဲ့တဲ့ စစ်ကိုင်းငလျင်ကြောင့် မန္တလေးမြို့မှာ လူပေါင်းထောင်နဲ့ချီ သေဆုံးခဲ့ပြီး အဆောက်အဦးပေါင်း ထောင်နဲ့ချီ ပြိုကျပျက်စီးခဲ့သလို လက်ရှိအချိန်ထိ ဖြိုဖျက်ဖို့ ကျန်နေသေးတဲ့ အန္တရာယ်ရှိ အဆောက်အဦးတွေလည်း ၁၀၀ ကျော် ကျန်ရှိနေသေးတယ်လို့ ဒေသခံတွေက ပြောပါတယ်။
ပြီးခဲ့တဲ့ ရက်ပိုင်းအတွင်းကလည်း မန္တလေးမြို့ပေါ်ကို ဗဟိုပြုပြီး ရစ်ချ်တာစကေး ၄.၈ အဆင့်ရှိတဲ့ ငလျင်တစ်ခု လှုပ်ခတ်မှု ဖြစ်ပွားခဲ့ပါသေးတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
