မြတ်နိုး၊ မတ်လ ၂ ရက်၊ လိုင်ဇာ
ကချင်ပြည်နယ် လိုင်ဇာမြို့နယ် ဝေကြိုင် စစ်ရှောင်စခန်းက ၃ နှစ်အရွယ် ကလေးကို စိတ်ကျန်းမာရေး ချို့ယွင်းသူ အမျိုးသားက မနေ့ မတ်လ ၁ ရက်က မီးရှို့ရိုက်နှက်ကာ သတ်ပစ်လိုက်ကြာင်း ဒေသခံတွေဆီက သိရပါတယ်။
“၃ နှစ်လောက်ပဲရှိတဲ့ ကလေးငယ်ကို သူတို့ အိမ်နားက စိတ်မနှံ့တဲ့ကောင်က ခေါ်သွားပြီးတာ့ တောထဲ ယာခင်း တဲထဲမှာ ဆံပင်တွေကိုလည်း မီးရှို့ထားတယ်။ ရိုက်လည်း ရိုက်ထားတယ်။ ဓားနဲ့လည်း လှီးထားတာ။ ခေါင်းလည်း ကွဲထားတယ်။ ခြေထောက် တစ်ဖက်လည်း ကျိုးနေတယ် ပြောတယ်” လို့ ဒေသခံ အမျိုးသမီးက ပြောပါတယ်။
ကလေးက မနက် ၈ နာရီလောက်ကတည်းက ပျောက်သွားတာဖြစ်ပြီး နေ့လယ် ၃ နာရီကျော်မှာ ပြန်တွေ့ကာ ပြန်တွေ့ချိန် အသက်ရှိသေးပေမဲ့ ရိုက်နှက်လှီးခုတ်ထားတဲ့ဒဏ်ရာ ပြင်းထန်တာကြောင့် ဆေးရုံ ရောက်ပြီးေနာက် သေဆုံးခဲ့တယ်လို့ သူက ပြောပါတယ်။
“ကလေးကို အသည်းအသန် ရှာနေကြချိန် အဲဒီအရူးက ဗူးထဲ ဓာတ်ဆီလား၊ ဒီဇယ်လား မသိဘူး လောင်းထည့်ပြီး တောဘက် ထွက်သွားတာ ေတွ့လို့ လိုက်သွားကြတာ။ သူ့နောက် လိုက်လာရင်း ယာတောက တဲထဲမှာ ကလေးကို ပြန်တွေ့တာ” လို့ နောက်ထပ် ဒေသခံ အမျိုးသမီးတစ်ဦးက ပြောပါတယ်။
သေဆုံးသွားတဲ့ ကလေးကတော့ ဝေကြိုင် ကွက် ၂ စစ်ရှောင်စခန်းကဖြစ်ပြီး အသက် ၃ နှစ်အရွယ် မောင်ဒန်ခေါင်တူး ဖြစ်တယ်လို့ ဆိုပါတယ်။
စိတ်ကျန်းမာရေး ချို့ယွင်းသူကို ထပ်လွှတ်ထားမယ်ဆိုရင် စိတ်ဖောက်လာရင် တခြား ကလေးတွေကိုပါ အခုလို ပြန်လုပ်လာနိုင်လို့ စိုးရိမ်ရတဲ့အတွက် လှောင်ထားသင့်ကြောင်း ကလေးမိခင်တွေက ပြောပါတယ်။
ပြီးခဲ့တဲ့ ဖေဖော်ဝါရီ ၂၂ ရက်ကလည်း ဂျဲယန် စစ်ရှောင်စခန်းက မိန်းကလးငယ် ၃ ဦးကို အဲဒီ ဂျဲယန် စစ်ရှောင်စခန်းမှာ အကြိမ်ကြိမ် ပြစ်မှု ကျူးလွန်ခဲ့ဖူးတဲ့ အမျိုးသားက ပြန်ပေးဆွဲကာ သတ်ဖြတ်ခဲ့ပါတယ်။
