လွေးလာဝ်ဇာရ်၊ ဩဂုတ် ၆ ရက်၊ သံတောင်ကြီး
ကရင်ပြည်နယ် သံတောင်ကြီးမှာ မိုးသည်းထန်စွာရွာသွန်းပြီး မြေပြိုမှုဖြစ်သွားတာကြောင့် ကလေး ၂ ဦးအပါအဝင် ဒေသခံ ၉ ဦးသေဆုံးပြီး ၃ ဦး ဒဏ်ရာရခဲ့တယ်လို့ ဒေသခံ အမျိုးသားတစ်ဦးဆီက သိရပါတယ်။
မနေ့ ဩဂုတ်လ ၅ ရက် ညသန်းခေါင်မှာ မြေပြိုမှုဖြစ်ပွားပြီး နေအိမ် ၃ဝ ကျော်လည်း ထိခိုက်ပျက်စီးသွားခဲ့တယ်လို့ ဆိုပါတယ်။
ဒေသခံ အမျိုးသားတစ်ဦးက “လက်ရှိအချိန်အထိ အလောင်းပြန်တွေ့တာက ၉ လောင်းဘဲရှိသေးတယ်။ ပျောက်ဆုံးနေတဲ့ သူတွေလည်း ဆက်ရှိနေသေးတယ်။ ပျောက်ဆုံးနေသူတွေကို ဆက်ရှာဖို့ လူအင်အား၊ စက်အင်အားတွေ အကူအညီလိုအပ်ပါတယ်။ ကျန်တဲ့သူတွေက ရှောင်နေရတယ်။ သောက်ရေသန့်တို့ နေထိုင်စရာနေရာတွေ မရှိဘူး။ အဲဒါတွေ အကူအညီလိုအပ်နေတယ်” လို့ ပြောပါတယ်။
မြေပြိုမှုကြောင့် သေဆုံးသွားတဲ့ သူတွေဟာ ကလေးငယ် ၂ ဦးအပါ အမျိုးသမီး ၁ ဦးနဲ့ အမျိုးသား ၆ ဦးတို့ဖြစ်ပြီး ပျောက်ဆုံးနေတဲ့သူတွေလည်း ဆက်ရှိနေတယ်လို့ ဆိုပါတယ်။
ဒီနေ့ ဩဂုတ်လ ၆ ရက် မနက်ပိုင်းမှာလည်း တောင်ငူကနေ သံတောင်ကြီးလမ်းမှာ မြေပြိုမှုကြောင့် လမ်းပိတ်နေတယ်လို့ သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
