ခိုင်လေး၊ ဇန်နဝါရီ ၆ ရက်၊ ဖလမ်း
ချင်းပြည်နယ် ဖလမ်းမြို့နယ်ထဲက စစ်သုံ့ပန်း ထားရှိတဲ့ ခွန်းလုံရွာကို စစ်တပ်က MIG-29 လေယာဉ်နဲ့ ဗုံးကြဲတိုက်ခိုက်ခဲ့တာကြောင့် ချင်းအမျိုးသား ကာကွယ်ရေးတပ်ဖွဲ့- CNDF ရဲ့ ရဲတစ်ဦးအပါအဝင် စစ်သုံ့ပန်း ၇ ဦး သေဆုံးခဲ့တယ်လို့ CNO/CNDF ရဲ့ ပြောရေးဆိုခွင့်ရှိသူ ဆလိုင်း တင်မီက ရွှေဖီမြေကို ပြောပါတယ်။
ဇန်နဝါရီ ၄ ရက် ည ၁၁ နာရီခွဲ ၁၂ နာရီကြားမှာ ကျောင်းနဲ့ တိုက်နယ်ဆေးခန်းကို နှစ်ကြိမ် ဗုံးကြဲတိုက်ခိုက်ခဲ့တယ်လို့ ဆိုပါတယ်။
“ရဲအုပ်တစ်ဦးနဲ့ ဒုရဲအုပ်သုံးဦး တပ်ကြပ်ကြီးရယ် တပ်ကြပ်ရယ် နောက်ပြီးတော့ ရဲမိန်းမတစ်ဦး ကျနော်တို့(CNDF)ဘက်က ရဲတစ်ဦးရယ် ဆုံးသွားပါတယ်။ ခွန်းလုံဆိုတဲ့ရွာမှာ ကျနော်တို့ စစ်သုံ့ပန်း ခဏယာယီထားတဲ့နေရာမှာ သူတို့က Target ထား(ဦးတည်)ပြီး ပစ်တာဖြစ်တယ်။ စကစအချင်းချင်း ပစ်တယ်လို့လည်း ပြောလို့ရပါတယ်”
သေဆုံးသွားတဲ့ စစ်သုံ့ပန်းတွေဟာ ၂၀၂၄ နိုဝင်ဘာ ၁၂ ရက်မှာ ဖလမ်းခရိုင် ရဲတပ်ဖွဲ့ရုံးနဲ့ မြို့နယ် ရဲတပ်ဖွဲ့ရုံးကို သိမ်းပိုက်စဉ် ဖမ်းဆီးရမိတဲ့ ရဲတပ်ဖွဲ့ဝင် ၄၅ ဦးထဲက ဖြစ်တယ်လို့ သိရပါတယ်။
ဖလမ်းမြို့ကို ၂၀၂၄ နိုဝင်ဘာ ၉ ရက်မှာ ချင်းညီနောင်နဲ့ မဟာမိတ်ပူးပေါင်းတပ်က မြို့သိမ်းတိုက်ပွဲ ဆင်နွှဲခဲ့ပြီး စစ်ကောင်စီရဲ့ နောက်ဆုံးလက်ကျန် တပ်ရင်းဖြစ်တဲ့ ခလရ ၂၆၈ ကို သိမ်းပိုက်နိုင်ရေး ဆက်လက် ထိုးစစ်ဆင်နေပါတယ်။
