ယာရူစိင်၊ ဩဂုတ် ၁၈ ရက်၊ ဒီပဲယင်း
စစ်ကိုင်းတိုင်း ဒီပဲယင်းနဲ့ ဝက်လက်မြို့နယ်ထဲ စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၇ ဦး သေဆုံးပြီး ၁၃ ဦး ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
ဒီနေ့ ဩဂုတ် ၁၈ ရက် နေ့လယ် ၁ နာရီခွဲခန့်မှာ ဒီပဲယင်းမြို့နယ် မူးကမ်းကြီးရွာ မိုးကောင်း ဘုန်းကြီးကျောင်းရှိ ဓမ္မာရုံကို လေကြောင်းကနေ ပေါင် ၅၀၀ ဗုံး ကြဲချတိုက်ခိုက်ခဲ့တာကြောင့် သံဃာတော်အပါအဝင် ၇ ဦး သေဆုံးပြီး ၁ဝ ဦး ဒဏ်ရာ ရခဲ့တယ်လို့ ဒေသခံ အမျိုးသားတစ်ဦးက ရွှေဖီမြေကို ပြောပါတယ်။
“တိုက်ပွဲ ဖြစ်ပွားတာမျိုး မရှိဘဲ ကြဲသွားတာပါ။ ဓမ္မာရုံကို ကြဲသွားတာဆိုတော့ သံဃာတော်နဲ့ တခြားဒေသခံတွေ သေဆုံးခဲ့ရတာပါ”
ဒီနေ့ ဩဂုတ် ၁၈ ရက် မနက် ၁၀ နာရီဝန်းကျင်မှာလည်း ဝက်လက်မြို့နယ် နဘဲပင်လှရွာရှိ ဘုန်းကြီးကျောင်းကို လေကြောင်းကနေ ဗုံးကြဲတိုက်ခိုက်တာကြောင့် ဒေသခံ ၃ ဦး ဒဏ်ရာ ရရှိခဲ့တယ်လို့ Wetlet Informational Network မှ တာဝန်ရှိသူတစ်ဦးက ပြောပါတယ်။
“ရွာထဲမှ ပြည်သူတွေ ရှိပါတယ်။ ဘုန်းကြီးကျောင်းက ရွာတောင်ဘက်မှာရှိတော့ အထိအခိုက် နည်းတာပါ။ ဒဏ်ရာရတာက လူကြီးတွေပါတော့ နည်းနည်းတော့ စိုးရိမ်ရတာပေါ့။ အထိအခိုက်က မများဘူးလို့တော့ သိရပါတယ်”
ပြီးခဲ့တဲ့ ဇူလိုင် ၁၇ ရက်ကလည်း ဝက်လက်မြို့အရှေ့ခြမ်းရှိ ရှားကွဲ၊ ငါးပတ်ချောင်းနဲ့ ရေလည်မော်ရွာကို စစ်တပ်က ဗုံးကြဲတိုက်ခိုက်ခဲ့တာကြောင့် ဒေသခံ ၂၁ ဦး သေဆုံးပြီး ၃၀ ဦးထက်မနည်း ဒဏ်ရာ ရရှိခဲ့ပါတယ်။
အလားတူ မေလ ၁၂ ရက်ကလည်း ဒီပဲယင်းမြို့နယ် အိုးထိန်းကွင်းရွာမှာ စစ်တပ်ရဲ့ ဗုံးကြဲတိုက်ခိုက်မှုကြောင့် သေဆုံးသူ ၂၃ ဦးအထိ ရှိခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
