ခိုင်လေး၊ ဧပြီ ၁၀ ရက်၊ ကျိုင်းတုံ
ရှမ်းအရှေ့ ကျိုင်းတုံမြို့နယ် စပယ်ရှယ်တောင်အဆင်း မိုင်တိုင် ၃၆၆/၆-၇ အကြား တောင်ကြီး-ကျိုင်းတုံသို့သွားတဲ့ လမ်းပေါ် မှာ ခရီးသည်တင်ယာဉ်တစ်စီး ပေ ၅၀၀ အနက်ရှိတဲ့ ချောက်ထဲ ထိုးကျခဲ့တာကြောင့် ကားနဲ့ လိုက်ပါလာတဲ့ ခရီးသည် ၇ ဦး သေဆုံးပြီး ကိုယ်ဝန်ဆောင် အမျိုးသမီးတစ်ဦးအပါအဝင် ၃ ဦး ဒဏ်ရာ ရခဲ့ပါတယ်။
ဧပြီ ၈ ရက် ည ၈ နာရီခွဲခန့်က Rozer ခရီးသည်တင် ၆ ဘီးကား တိမ်းမှောက်ခဲ့ပြီး ကားထဲ လိုက်ပါလာတဲ့ ကိုယ်ဝန်ဆောင် အမျိုးသမီးတစ်ဦး ပြင်းထန်ဒဏ်ရာ ရခဲ့တာကြောင့် ၎င်းအမျိုးသမီးကို ဆေးရုံသို့ ပို့ပေးခဲ့တယ်လို့ နှလုံးလှပိုင်ရှင်များ လူမှုကူညီရေးအသင်းမှ တာဝန်ရှိသူတစ်ဦးက ရွှေဖီမြေကို ပြောပါတယ်။
”ကားက ဘယ်လိုဖြစ်လို့ မှောက်တာလဲတော့ မသိဘူး။ သူတို့က အရေးပေါ်ဖုန်း ဆက်လာတာ ကားမှောက်တယ် လူနာရှိတယ် အရေးပေါ် ဖြစ်နေတယ်ပြောတော့ ကျနော်လည်း သွားကြည့်တာ။ ၇ ဦး သေဆုံးတာ။ ညကတည်းက အလောင်း ထုတ်တာ ၆ ဦးဘဲ ရသေးတယ်။ နောက်တစ်ဦး ကျန်တယ်။ ကား ပိနေတော့ မရသေးဘူး။ အခုချိန်ထိလည်း ထုတ်ဖို့ လုပ်နေတုန်းပါဗျ”
ကားတိမ်းမှောက်တဲ့နေရာကို ကျိုင်းတုံခရိုင်မီးသတ်စခန်းမှ ရှာဖွေကယ်ဆယ်ရေးယာဉ် တပ်ဖွဲ့အပါအဝင် တိုင်းနေ နာရေးကူညီမှုအသင်းနဲ့ နှလုံးလှပိုင်ရှင်များ လူမှုကူညီရေးအသင်းက ရှာဖွေကယ်ဆယ်ရေးလုပ်ငန်း ဆောင်ရွက်ခဲ့ကြတာ ဖြစ်ပါတယ်။
လူမှုကူညီရေးအသင်းတွေက သေဆုံးသူတွေရဲ့ အလောင်းတွေကို ကျိုင်းတုံ ဆေးရုံရှိ ရင်ခွဲရုံသို့ ပို့ဆောင်ပေးခဲ့ပြီး ဒဏ်ရာ ရသူကိုလည်း ကုသမှု ခံယူနိုင်ဖို့ ဆေးရုံသို့ ကူညီပို့ဆောင်ပေးထားတယ်လို့ ဆိုပါတယ်။
ပြီးခဲ့တဲ့ မတ်လ ၂၀ ရက်ကလည်း စပယ်ရှယ်တောင် မိုင်းဇင်းအုပ်စု ပန်လော့(အထက်)ရွာ နတ်စင်ကွေ့ မိုင်တိုင်အမှတ်(၄၀၃/၇)နဲ့ (၄၀၄/၀)ကြားမှာ ယာဉ်တိမ်းမှောက်မှု ဖြစ်ပွားပြီး တစ်ဦး သေဆုံးကာ ၃ ဦး ဒဏ်ရာ ရခဲ့ဖူးပါတယ်။
အလားတူ ပြီးခဲ့တဲ့ မတ်လ ၁ ရက်ကလည်း GI Express ခရီးသည်တင်ယာဥ်ဟာ စပယ်ရှယ်တောင် လက်ပံကွေ့(၁) ပြည်ထောင်စုလမ်းမကြီး မိုင်တိုင်အမှတ် (၃၆၆ မိုင် ၆/၇ ဖာလုံ)ကြားမှာ ချောက်ထဲ ထိုးကျကာ တိမ်းမှောက်ခဲ့တာကြောင့် ၇ ဦး သေဆုံးပြီး ၁၅ ဦး ဒဏ်ရာ ရရှိခဲ့ဖူးပါတယ်။
