ရဲမာန်၊ ဒီဇင်ဘာ ၁၁ ရက်၊ တောင်ငူ
ပဲခူးတိုင်း တောင်ငူမြို့ရဲ့ လေတပ်စခန်းကို ရှော့တိုက်ဒုံး ၆ လုံးနဲ့ ပစ်ခတ်ခဲ့ရာ အကုန်လုံးပေါက်ကွဲခဲ့တယ်လို့ Brave Warriors for Myanmar(B.W.M)က မနေ့ ဒီဇင်ဘာ ၁၀ ရက်မှာထုတ်ပြန်လာပါတယ်။
ပြီးခဲ့တဲ့ ဒီဇင်ဘာ ၉ ရက် ၁၀ နာရီဝန်းကျင်မှာ ကေတုမတီလေတပ်စခန်းကို ၁၀၇ မမ ရှော့တိုက်ဒုံး ၆ လုံးနဲ့ပစ်ခတ်ခဲ့ပြီး ယမ်းဂိုဒေါင် အနီး လုံခြုံးရေး တာဝန်ယူထားသူ ၆ ဦးလည်း သေဆုံးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
“အဓိကတော့ လေယဉ်ဆီလှောင်ကန်တွေကို ပစ်မှတ်ထားတိုက်ခိုက်ခဲ့တာပါ။ ကျနော်တို့က ၉နာရီ၅၅ မိနစ်မှာ ပစ်လိုက်တယ်။ ပစ်ခတ်မှုအပြီး ရန်သူဘက်က ည ၁၀ နာရီ ၂၀ လောက်ကတည်းက လက်နက်ကြီးတွေနဲ့ အနီးနားတပ်ပေါင်းစုံက ဝိုင်းဝန်းပစ်ခတ်တာ ည ၂ နာရီကျော်တဲ့အထိတောက်လျှောက်ပါပဲ။ ဒါပေမယ့် ရဲဘော်အားလုံးဘေးကင်းလုံခြုံစွာဆုတ်ခွာနိုင်ခဲ့ပါတယ်” B.W.M က တာဝန်ရှိသူတစ်ဦးက ရွှေဖီမြေကို ပြောပါတယ်။
အဆိုပါပစ်ခတ်မှုကြောင့် အခုနောက်ပိုင်း အသုံးများနေတဲ့ ပေါင် ၁၅၀၊ ပေါင် ၂၀၀၊ ပေါင် ၃၀၀ ဗုံးသီးတွေ ထားရှိတဲ့ ဂိုဒေါင်မှာ နာရီဝက် ကျော်ခန့် ပေါက်ကွဲခဲ့တယ်လို့ ဖော်ပြထားပါတယ်။
အဓိက ရည်ရွယ်ပစ်မှတ်မှာ ဆီလှောင်ကန်ဖြစ်သော်လည်း ထိမှန်မှုရှိကြောင်း ကြားသိရခြင်း မရှိသေးပဲ အထက်ပါ အပျက်အစီးတွေသာ ကြားသိရသည့်အတွက် နောက်အကြိမ်တွေမှာ ပိုမိုထိရောက်အောင်ကြိုးစားရပါဦးမယ်လို့ ထုတ်ပြန်ထားပါတယ်။
ရန်သူ့ဘက်က အထပ်ထပ်ပိတ်ဆို့ထားတဲ့ကြားက ခုလိုပြုလုပ်နိုင်ခဲ့တာဟာ နယ်မြေခံမဟာမိတ်တွေရဲ့အထူးပူးပေါင်းဆောင်ရွက်မှုကြောင့် ဖြစ်တာမို့ ကျနော်တို့ရဲ့မဟာမိတ်အဖွဲ့တွေကို အထူးပဲ ကျေးဇူးတင်ကြောင်း ၎င်းက ဆက်ပြောပါတယ်။
အဆိုပါတိုက်ခိုက်မှုကို Brave Warriors for Myanmar အဖွဲ့ရဲ့ ဦးဆောင်စီမံမှုဖြင့် Mountain Knight Civilian Defense Forces (MKCDF)၊ Anti-Coup People’s Liberation Force (ACPLF) ၊ သံတောင်မြောက်ပိုင်း အထူးဒေသ ဖိုက်တာဆားခဲအဖွဲ့တို့သည် KNLA တပ်မဟာ ၂ နဲ့ တပ်ရင်း ၅ တို့က ပူးပေါင်းပြီး တိုက်ခိုက်ခဲ့တယ်လို့ ဖော်ပြထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
