အိုက်ပွီး၊ ဧပြီ ၁၀ ရက်၊ တီးတိန်
ချင်းပြည်နယ် တီးတိန်မြို့နယ် Saizang ကျေးရွာကို စစ်ကောင်စီတပ်က လေကြောင်းနဲ့ တိုက်ခိုက်လို့ ကလေးငယ်အပါအဝင် မိသားစုဝင် ၆ ဦး သေဆုံးခဲ့တယ်လို့ ဒေသခံတွေဆီက သိရပါတယ်။
မနေ့ ဧပြီ ၉ ရက် ည ၁၂ နာရီဝန်းကျင်မှာ အရပ်သားတွေ နေထိုင်တဲ့ Saizang ရွာကို ပေါင် ၅၀၀ ဗုံးသီးတစ်လုံးနဲ့ လေကြောင်းကနေ ကြဲချတိုက်ခိုက်ခဲ့တာပဲ ဖြစ်ပါတယ်။
“ဗုံးသီးက ပေါင် ၅၀၀ တစ်လုံးလောက်ပဲထင်တယ်။ လူအိပ်တဲ့အချိန်မှာ ဗုံးကြဲသွားတာပါ။ မိသားစုဝင်တစ်စုတည်း ၆ ဦး ပွဲချင်းပြီး သေဆုံးသွားတယ်။ ကလေးတွေလည်း ပါတယ်။ တစ်ယောက် ဒဏ်ရာ ရတယ်” လို့ တီးတိန်မြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
သေဆုံးသူတွေဟာ Pau Sian Kham၊ Cing Sen Don၊ Kham Ho Van၊ Cing Sian Nuam၊ Suan Deih Sian၊ Kim Deih Piang တို့ ဖြစ်တယ်လို့ ဆိုပါတယ်။
Saizang ရွာမှာ တိုက်ပွဲ ဖြစ်ပွားတာ မရှိသလို တော်လှန်ရေးတပ်ဖွဲ့ ထိန်းချုပ်ထားပေမဲ့ တော်လှန်ရေးတပ်ဖွဲ့တွေ တပ်စွဲတာ၊ စခန်းထိုင်တာ၊ စစ်ရေး လှုပ်ရှားတာ မရှိဘဲ အရပ်သားတွေ နေတဲ့နေရာကို လေကြောင်းနဲ့ တိုက်ခိုက်ခဲ့တာပဲ ဖြစ်ပါတယ်။
လေကြောင်းနဲ့ ဗုံး ထပ်ကြဲမှာကို စိုးရိမ်နေတဲ့ ဒေသခံတွေဟာ တောတောင်နဲ့တောင်ယာတွေမှာ ထွက်ပြေးတိမ်းရှောင်နေကြရတယ်လို့ သိရပါတယ်။
တီးတိန်မြို့ဟာ စစ်ကောင်စီ ထိန်းချုပ်တဲ့ မြို့ ဖြစ်ပေမဲ့ မြို့ပေါ်ကလွှဲရင် ကျန်တဲ့နေရာတွေကို တော်လှန်ရေးတပ်ဖွဲ့ဘက်က ထိန်းချုပ်ထားပါတယ်။
မနေ့ ဧပြီ ၉ ရက် နေ့လယ် ၃ နာရီမှာလည်း စစ်ကိုင်းတိုင်း ဝန်းသိုမြို့နယ်က နမ့်ခမ်းရွာ (ဂျိုးတောင်နမ့်ခမ်း)ကို ဗုံးကြဲတိုက်ခိုက်ခဲ့ရာ ကလေးငယ်အပါအဝင် ၂၄ ဦးထက်မနည်း သေဆုံးခဲ့ပါတယ်။
