ရွှေဖီမြေ၊ ဖေဖော်ဝါရီ ၁၇ ရက်၊ ဘီးလင်း
ကရင်အမျိုးသား အစည်းအရုံး- KNU ရဲ့ ကော်သူးလေ အုပ်ချုပ်နယ်မြေ ဒူးသထူ (သထုံ)ခရိုင် ဘီးလင်းမြို့နယ်မှာ စစ်ကောင်စီတပ်က လေယာဥ်နဲ့ ဗုံးသီး ၂ လုံး ကြဲချတိုက်ခိုက်ခဲ့တာကြောင့် ဒေသခံ ၅ ဦး ထိမှန်ဒဏ်ရာ ရခဲ့တယ်လို့ KNU က မနေ့ ဖေဖော်ဝါရီ ၁၆ ရက်မှာ ထုတ်ပြန်ထားပါတယ်။
ပြီးခဲ့တဲ့ ဖေဖော်ဝါရီ ၁၅ ရက် ည ၁၁ နာရီခွဲမှာ ဘီးလင်းမြို့နယ် ကော်ဟဲကျေးရွာအုပ်စု ကော်ဟဲရွာအနီးကို စစ်တပ်က ဗုံးကြဲခဲ့တာကြောင့် ကောင်းဟဲရွာက စောထီးခုနဲ့ ယားနော့ပတားအပါအဝင် ရွာခံ ၅ ဦး ထိမှန်ဒဏ်ရာ ရခဲ့တယ်လို့ ဆိုပါတယ်။
ဒါ့အပြင် ကော်ဟဲရွာက နေအိမ် ၉ လုံးနဲ့ ဒေသခံတွေရဲ့ ပစ္စည်းတချို့ ထိမှန်ပျက်စီးခဲ့တယ်လို့လည်း ဖော်ပြထားပါတယ်။
ပြီးခဲ့တဲ့ ဖေဖော်ဝါရီ ၁၃ ရက် မနက် ၁၀ နာရီခွဲခန့်မှာလည်း ကျိုက်ထိုမြို့နယ် ပိန္နဲကုန်းရွာပတ်ဝန်းကျင်နဲ့ ကျေးရွာ ဘုန်းကြီးကျောင်းကို စစ်တပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် အရပ်သား ၁၀ ဦးကျော် ထိမှန်ခဲ့ပြီး အဲဒီအထဲက ၃ ဦး သေဆုံးခဲ့တယ်လို့ KNU က ဖေဖော်ဝါရီ ၁၃ ရက် ညပိုင်းမှာ ထုတ်ပြန်ထားပါတယ်။
KNU ထိန်းချုပ်ဒေသမှာ စစ်တပ်က လက်နက်ကြီးနဲ့ လေကြောင်းကနေ ဗုံးကြဲတိုက်ခိုက်မှုကြောင့် ဒေသခံတွေ မကြာခဏ ထိခိုက်ဒဏ်ရာ ရရှိနေပါတယ်။
