မြတ်နိုး၊ ဇူလိုင် ၁၈ ရက်၊ ဖားကန့်
ကချင်ပြည်နယ် ဖားကန့်မှာ ဒီနေ့ ဇူလိုင် ၁၈ ရက် ညနေပိုင်းက လက်နက်ကြီးကျလို့ ဒေသခံ ၅ ဦး ထိခိုက်ဒဏ်ရာ ရသွားသလို လေကြောင်းနဲ့လည်း ဗုံးကြဲတိုက်ခိုက်သွားခဲ့ကြောင်း ဒေသခံတွေဆီက သိရပါတယ်။
“လေယာဉ်ဗုံးက ခုဏ ညနေ ၅ နာရီ ၄၀ လာကြဲသွားတာ။ လက်နက်ကြီး ကျတာက လေယာဉ် ဗုံးကြဲတဲ့ရှေ့မှာ။ ရဲစခန်းရှေ့နားမှာလို့ သိရတယ်” လို့ ဒေသခံ လူငယ်တစ်ဦးက ပြောပါတယ်။
လေကြောင်းကနေ ဗုံးလာကြဲသွားတဲ့ နေရာအတိအကျကို မသိရသေးဘူးလို့ သူက ပြောပါတယ်။
“ဖားကန့်မြို့ အ.ထ.ကကျောင်းရှေ့ လမ်းဆုံဘက် ဗျူဟာကုန်းနဲ့ ရဲစခန်းကြားမှာ ဇူလိုင်လ ၁၈ ရက်နေ့ ညနေ ၄ နာရီလောက်က လက်နက်ကြီးတစ်လုံး ကျကွဲတာ” လို့ ဒေသခံ အမျိုးသားတစ်ဦးက ပြောပါတယ်။
လက်နက်ကြီး ကျရောက်ပေါက်ကွဲမှုကြောင့် ရေခဲမုန့်ရောင်းတဲ့ အမျိုးသမီးတစ်ဦး၊ အားကစား ပစ္စည်းဆိုင်က အမျိုးသမီးနှစ်ဦး၊ လမ်းသွားလမ်းလာ ဆိုင်ကယ်မောင်း ဖြတ်သန်းလာတဲ့ အမျိုးသားနှစ်ဦး ထိခိုက်ဒဏ်ရာရခဲ့ပြီး အနည်းအကျဉ်း ထိသူတွေလည်း ရှိတယ်လို့ ပြောပါတယ်။
ဖားကန့်ဒေသမှာ စစ်တပ်နဲ့ KIA, KPDF ပူးပေါင်းတော်လှန်ရေးတပ်ဖွဲ့တို့အကြား နှစ်ဖက် ထိတွေ့တိုက်ပွဲ နေ့တိုင်းလိုလို ဖြစ်ပွားနေပြီး ပစ်လိုက် နားလိုက် ဖြစ်နေပြီး ပြင်းပြင်းထန်ထန် ဖြစ်ပွားတာမျိုးတော့ မရှိဘူးလို့ ဒေသခံတွေက ပြောပါတယ်။
စစ်တပ်က ဖားကန့်ဒေသအားလုံးကို ပြန်လည် ထိန်းချုပ်နိုင်ဖို့ ပြီးခဲ့တဲ့ ဇွန်လကတည်းက စစ်ကြောင်းထိုး လှုပ်ရှားနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
