အိုက်ပွီး၊ လွေးလာဝ်ဇာရ်၊ နိုဝင်ဘာ ၇ ရက်၊ ပုဏ္ဏားကျွန်း
ရခိုင်ပြည်နယ် ပုဏ္ဏားကျွန်းမြို့နယ်ထဲက ကျေးရွာ ၃ ရွာ လေကြောင်းအပြင် လက်နက်ကြီးနဲ့ ပစ်ခတ်တိုက်ခိုက်ခံရတာကြောင့် ဒေသခံ ၅ ဦး သေဆုံးပြီး ၉ ဦး ဒဏ်ရာ ရခဲ့ပါတယ်။
ဒီနေ့ နိုဝင်ဘာ ၇ ရက် မနက် ၁၁ နာရီခွဲမှာ ယိုးတရုပ်ရွာကို လေကြောင်းကနေ တိုက်ခိုက်ခဲ့ပြီး ကွမ်းတောင်နဲ့ အောင်ဖြူပြင်ရွာကို လက်နက်ကြီးနဲ့ ပစ်ခတ်ခဲ့ကြောင်း ဖြစ်စဉ်သိရှိသူ အမျိုးသမီးတစ်ဦးက ပြောပါတယ်။
“ဒီနေ့ တစ်ရက်ထဲမှာဘဲ လာပစ်သွားတာ။ လက်နက်ကြီးလည်း ပစ်တယ်။ ၅ ယောက် သေ ၉ ယောက် ဒဏ်ရာ ရတယ်။ ဟိုတစ်ခါလည်း ယိုးတရုပ်ရွာမှာဘဲ လေယာဉ်နဲ့ကြဲသွားတယ်”
ယိုးတရုပ်ရွာမှာ လေယာဉ်နဲ့ ဗုံးနှစ်လုံး ကြဲချတိုက်ခိုက်မှုကြောင့် အမျိုးသမီး ၄ ဦးအပါအဝင် ၅ ဦး သေဆုံးပြီး အမျိုးသမီး ၃ ဦးအပါအဝင် ၇ ဦး ထိခိုက်ဒဏ်ရာ ရရှိခဲ့ပါတယ်။
ယိုးတရုပ်ရွာ လေကြောင်း တိုက်ခိုက်မှုကြောင့် လူနေအိမ်တွေလည်း ဗုံးစ ထိမှန်ပျက်စီးသွားပြီး ပျက်စီးမှု အသေးစိတ်ကိုတော့ မသိရသေးပါဘူး။
ပုဏ္ဏားကျွန်းမြို့နယ်ဒေသခံတစ်ဦးက “ရွာထဲမှာ ဗုံးကြဲတာဆိုတော့ လူနေအိမ်တွေလည်း အတော်လေးကို ပျက်စီးသွားပါတယ်။ အသေးစိတ်ကိုတော့ မသိရသေးပါဘူး။ အခု လူတွေ ရှာဖွေကယ်ဆယ်ရေး လုပ်နေကြလို့ အလုပ်ရှုပ်နေကြပါတယ်” လို့ ရွှေဖီမြေသို့ ပြောပါတယ်။
ကွမ်းတောင်ရွာမှာတော့ စစ်တွေအခြေစိုက် စစ်ကောင်စီရဲ့ ခြေမြန်တပ်ရင်း ၃၄၄ က ၁၂၀ မမ လက်နက်ကြီး ပစ်ခတ်ခဲ့တာကြောင့် အမျိုးသားတစ်ဦး ဒဏ်ရာ ရရှိကာ အောင်ဖြူပြင်ရွာမှာလည်း အသေခံဒရုန်းနဲ့ ဗုံးနှစ်လုံး ကြဲချခဲ့တာကြောင့် အမျိုးသမီး ၁ ဦး ဒဏ်ရာ ရရှိခဲ့တယ်လို့ ဆိုပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
