ယာရူစိင်၊ ဖေဖော်ဝါရီ ၁၀ ရက်၊ မိုးကုတ်
တအာင်းတပ် ထိန်းချုပ်ထားတဲ့ မိုးကုတ်မြို့မှာ လေကြောင်း တိုက်ခိုက်မှုကြောင့် သေဆုံးသူ ၅ ဦးအထိ ရှိလာပြီး ၄ နှစ်ကလေးငယ်အပါအဝင် ၂၀ ဦး ဒဏ်ရာ ရရှိခဲ့တယ်လို့ သိရပါတယ်။
ဒီနေ့ ဖေဖော်ဝါရီ ၁၀ ရက် မနက်အစောပိုင်း ၁၂ နာရီကျော်မှာ မိုးကုတ်အနောက်ပိုင်းရှိ ဝင်းထရံ ကျောက်လုပ်ကွက်ကို Y-12 လေယာဉ်နဲ့ ဗုံးအလုံး ၂၀ ကျော် ကြဲချတိုက်ခိုက်ခဲ့တာ ဖြစ်ပါတယ်။
“ဒဏ်ရာရတဲ့အထဲ ၄ နှစ် ကလေးတစ်ယောက်လဲ ပါတယ်ဗျ။ သေဆုံးသူတွေက အကုန်အမျိုးသားတွေဘဲဗျ။ နမ့်ဆန်က တစ်ယောက်၊ ကသဲအုပ်စု နန်းနွဲ့ရွာက တစ်ယောက်နဲ့ မြို့ကြီးရွာက တစ်ယောက် ကျန်တဲ့ ၂ ယောက်တော့ မသိရဘူးဗျ” လို့ မြေပြင်အခြေအနေသိရှိသူ အမျိုးသားတစ်ဦးက ရွှေဖီမြေကို ပြောပါတယ်။
မိုးကုတ်မြို့ကို စစ်တပ်က မကြာခဏ ဗုံးကြဲချလေ့ ရှိတာကြောင့် ဖုန်းလိုင်းနဲ့ အင်တာနက်လိုင်းကို TNLA ဘက်က ပိတ်ပင်ထားပါတယ်။
ပြီးခဲ့တဲ့ ဖေဖော်ဝါရီ ၆ ရက်မှာလည်း TNLA ထိန်းချုပ်ထားတဲ့ နောင်ချိုမြို့ လေကြောင်း တိုက်ခိုက်ခံရမှုကြောင့် အရပ်သား ၁ ဦး ထိခိုက်ဒဏ်ရာ ရရှိခဲ့ပါတယ်။
TNLA ရဲ့ထုတ်ပြန်ချက်အရ ဇန်နဝါရီလအတွင်း TNLA ထိန်းချုပ်ဒေသမှာ စစ်တပ်က ဗုံးကြဲတိုက်ခိုက်မှုကြောင့် အရပ်သား ၁၃ ဦး သေဆုံးပြီး ၂၆ ဦး ထိခိုက်ဒဏ်ရာ ရရှိခဲ့ပါတယ်။
