အိုက်ပွီး၊ အောက်တိုဘာ ၉ ရက်၊ မင်းတပ်
ချင်းပြည်နယ်၊ မင်းတပ်မြို့နယ်မှာ စစ်ကောင်စီ လေကြောင်း တိုက်ခိုက်လို့ ကျောင်းသား/သူ ၄ ဦးသေဆုံးပြီ ၁၂ ဦး ဒဏ်ရာရရှိခဲ့တယ်လို့ ဒေသခံတွေဆီက သိရပါတယ်။
မင်းတပ်မြို့နယ်၊ ဝမ္မသူးကျေးရွာနဲ့ ထင်းချောင်းကျေးရွာ စာသင်ကျောင်းတွေကို မနေ့ အောက်တိုဘာ ၈ ရက်နေ့ည ၇ နာရီဝန်းကျင်မှာ စစ်ကောင်စီက လေကြောင်း ဗုံးကြဲတိုက်ခိုက်လို့ ကျောင်းသား/သူ တွေ ထိခိုက်သေဆုံးခဲ့တာပါ။
“ဝမ္မသူးကျေးရွာမှာ လူထိခိုက်သေဆုံးမှု မရှိဘူး။ ထင်းချောင်းရွာ စာသင်ဝိုင်းမှာ ကျောင်းသား/သူတွေ ထိခိုက်သေဆုံးမှုရှိတာပါ။ မသန်စွမ်းတစ်ဦးအပါအဝင် ၄ ဦးပွဲချင်းပြီး ဆုံးတယ်။ ၁၂ယောက်လောက်ဒဏ်ရာရတယ်။ ပြင်းထန်ဒဏ်ရာရတဲ့သူလည်းပါတယ်။”လို့ မင်းတပ်မြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ပြင်းထန်ဒဏ်ရာရတဲ့ ကျောင်းသား/သူတွေလည်း အသက်အန္တရာယ် စိုးရိမ်ရသူတွေ အများအပြားပါဝင်တယ်လို့ သိရပါတယ်။
ဒါ့အပြင် လေကြောင်း ဗုံးကြဲတိုက်ခိုက်၍ ဝမ္မသူးကျေးရွာ စာသင်ကျောင်းနဲ့ ထင်းချောင်းရွာ RC ဘုရားရှိးခိုးကျောင်းလည်း ဗုံးစထိမှန် မီးလောင်ပျက်စီးသွားတယ်လို့ သိရပါတယ်။
“RC ဘုရားကျောင်းမှာ ကလေးတွေ စာကျက်ကြတာ။ အဲမှာဗုံးကြဲတော့ လူတွေရော ဘုရားကျောင်းပါ ပျက်စီးသွားတာ။ ပြီးတော့ ဝမ္မသူးရွာက စာသင်ကျောင်းကိုလည်း ဗုံးကြဲသွားတယ်။ ကျောင်းအဆောက်အဦးအကုန် ပျက်စီးသွားတယ်။”လို့ မင်းတပ်မြို့နယ်ဒေသခံတစ်ဦးက ရွှေဖီမြေသို့ ပြောပါတယ်။
ပြီးခဲ့တဲ့ အောက်တိုဘာလ ၄ ရက် နှဲ့ ၅ ရက်နေ့ကလည်း မင်းတပ်မြို့ကို စစ်ကောင်စီ လေကြောင်း ဗုံးကြဲတိုက်ခိုက်၍ အရပ်သား ၄ ဦးထိခိုက်ဒဏ်ရာရခဲ့ပြီး ဟိုတယ်အပါအဝင် လူနေအိမ် ၁၀ လုံးထက်မနည်း ပျက်စီးသွားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
