အင်းငယ်၊ ဧပြီ ၁ ရက်၊ မန္တလေး
မန္တလေးတိုင်း အိုးဘိုအကျဉ်းထောင်မှာ ငလျင်ဒဏ်ကြောင့် အကျဉ်းသား ၄ ဦး သေဆုံးပြီး ၁၀ ဦးခန့် ပြင်းထန်ဒဏ်ရာ ရရှိထားတယ်လို့ ထောင်နဲ့ နီးစပ်သူတွေက ပြောပါတယ်။
မတ်လ ၂၈ ရက်က ငလျင် လှုပ်ခတ်နေချိန်အတွင်း အကျဉ်းသားတွေကို ထွက်ပြေးခွင့် မပေးတာကြောင့် အခုလို ထိခိုက်သေဆုံးရတာလို့ ဆိုပါတယ်။
ထောင်နဲ့ အဆက်သွယ် ပုံမှန်ရရှိနေသူတစ်ဦးက “ငလျင်လှုပ်ပြီး တော်တော်ကြာမှ ဖွင့်ပေးတာပါ။ ဖွင့်တဲ့အချိန်က ထိတဲ့သူ ထိနေပြီ။ အုတ်နံရံတွေ ပြိုကျလို့လေ။ အဲညတော့ အပြင်မှာ အိပ်ခွင့်ပေးပါတယ်။ နောက်ညကျတော့ အထဲကို အတင်းမောင်းသွင်းပြီး မဝင်ရင် စစ်တပ်ခေါ် ပစ်ခိုင်းမယ်လို့ ပြောပါတယ်။ အခုလည်း အန္တရာယ် မကင်းပါဘူး” လို့ ပြောပါတယ်။
ထိုခိုက်သေဆုံးသူ ၃ ဦးထဲမှာ အမျိုးသား ၂ ဦး၊ အမျိုးသမီးတစ်ဦး ပါဝင်ပြီး ကျန်တစ်ဦးကိုတော့ ကျားမ အတည်ပြုနိုင်ဖို့အတွက် ရွှေဖီမြေက စုံစမ်းနေဆဲ ဖြစ်ပါတယ်။
ဒါ့အပြင် ဒဏ်ရာရရှိသူ ၁၀ ဦးကိုလည်း အကျဉ်းသားလား၊ ထောင်ဝန်ထမ်းတွေလားဆိုတာ သိရှိနိုင်ဖို့အတွက် ဆက်သွယ်မေးမြန်းနေဆဲဖြစ်ပြီး နောက်ထပ် အတည်ပြုနိုင်ဖို့အတွက် သေဆုံးသူ ၈ ဦး ကျန်သေးတယ်လို့ သိရပါတယ်။
မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ယက် ဦးဆောင်ကော်မတီဝင်ဖြစ်သူ ကိုသိုက်ထွန်းဦးက “ဒဏ်ရာရ လူနာတွေကိုတော့ ထောင်ဆေးရုံမှာ ကုသပေးနေတယ်။ ဒါပေမဲ့ ထောင်ဆိုတာက နဂိူမူလကတည်းက ကျနော်တို့ ဆေးဝါး လုံလောက်မရှိတဲ့အပေါ်မှာတော့ အခက်အခဲ အများကြီး ကြုံနေရတယ်” လို့ ပြောချင်ပါတယ်။
လက်ရှိ အိုးဘိုအကျဉ်းထောင်မှာ ငလျင်ဒဏ်ကြောင့် အဆောက်အဦး အက်ကွဲတာ၊ ယိုင်နဲ့တာတွေ ကြုံနေရပေမဲ့ အကျဉ်းသားတွေကို အဆောင်ပြောင်းပေးတာမျိုး မရှိဘဲ အခန်းတစ်ခန်းမှာ လူပေါင်း ၁၆၀ အထိ ပြွတ်သိပ် ထည့်ထားတယ်လို့လည်း သိရပါတယ်။
မြန်မာနိုင်ငံတစ်ဝှမ်းရှိ အကျဉ်းထောင်တွေရဲ့ ထိခိုက်မှုကို စုံစမ်းနေဆဲဖြစ်ပြီး ဒိုက်ဦး၊ ညောင်ဦး၊ ပုသိမ်၊ မိတ္ထီလာ၊ သာယာဝတီ၊ အင်းစိန်၊ သရက်၊ မအူပင်၊ တောင်ငူ၊ ကလေး စတဲ့ထောင် ၁၀ ခုမှာတော့ လူထိခိုက်သေဆုံးမှု မရှိဘူးလို့ PPNM တာဝန်ရှိသူတွေက ပြောဆိုထားပါတယ်။
