ရဲမာန်၊ အောက်တိုဘာ ၃ ရက်၊ ရွှေဘို
စစ်ကိုင်းတိုင်း ရွှေဘိုမြို့မှာ စစ်ကောင်စီတပ်ရဲ့ လက်နက်ကြီး ရမ်းသမ်း ပစ်ခတ်မှုကြောင့် ကိုရင်လေး ၄ ပါး ပျံလွန်တော်မူခဲ့တယ်လို့ ဒေသခံအမျိုးသားတစ်ဦးက ရွှေဖီမြေကို ပြောပါတယ်။
မနေ့ အောက်တိုဘာ ၂ ရက် မနက် ၁၁ နာရီမှာ ဟောင်ဝှစ်ဇာနဲ့ ၁၂၀ မမ လက်နက်ကြီး ရမ်းသမ်း ပစ်ခတ်မှုကြောင့် သမိုင်းဝင် အောင်မြေဘုန်းကြီးကျောင်းမှာ ကျရောက်ပေါက်ကွဲခဲ့ရာ ဘုန်းကြီး ၇ ပါးလည်း ဒဏ်ရာ ရရှိခဲ့တယ်လို့ ၎င်းက ပြောပါတယ်။
“ရွှေဘိုမြို့ တောင်ဘက်အထွက်မှာ နယ်မြေခံ ပကဖအဖွဲ့တွေနဲ့ တိုက်ပွဲ ဖြစ်တာကို မြို့တွင်း အထိုင်တပ်တွေကနေ လက်နက်ကြီး ပစ်ကူပေးတာ။ ပစ်ကူပေးနေတာကတော့ ခဏခဏ ပစ်ပေးနေတာ။ မြို့တွင်း ၃ လုံး ကျတာ။ ၂ လုံးက မကွဲတာ။ TWS ကိုယ်ပိုင်ကျောင်းအနီးနဲ့ ဆည်မြောင်းရုံးအနီးမှာက မပေါက်ကွဲခဲ့ဘူး”
ပစ်ခတ်မှုကြောင့် အသက် ၁၄ နှစ်အရွယ် ရှင်ဉာဏိက၊ ရှင်ဥတ္တမ၊ ရှင်ဝိမလနဲ့ ဆိပ်ခွန်ရွာက စာသင်သား ကိုရင်လေးတစ်ပါးတို့ ပျံလွန်တော်မူခဲ့တယ်လို့ ၎င်းက ဆက်ပြောပါတယ်။
လူထုတွေအနေနဲ့ ဗုံးသံ သေနတ်သံ ကြားတဲ့အချိန်မှာ ကျည်ကွယ်ရာနေရာမှာ နေထိုင်ကြဖို့နဲ့ လက်နက်ကြီးအန္တရာယ်ကာကွယ်ရေး နည်းလမ်းတွေကို လေ့လာထားကြဖို့အပြင် သတိထား နေထိုင်ကြဖို့လည်း တော်လှန်ရေးတပ်ဘက်က တိုက်တွန်းထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
