ပို့လဘား၊ စက်တင်ဘာ ၁၀ ရက်၊ မိုးကုတ်
တအာင်းတပ်-PSLF/TNLA ထိန်းချုပ်ထားတဲ့ မိုးကုတ်မြို့မှာ ဂတ်အိုးပေါက်ကွဲမှုကြောင့် အမျိုးသား ၄ ဦး ထိခိုက်ဒဏ်ရာရရှိခဲ့တယ်လို့ သိရပါတယ်။
ပြီးခဲ့တဲ့ စက်တင်ဘာ ၈ ရက် မနက် ၈ နာရီခွဲအကျော်မှာ မိုးကုတ်မြို့ ရှောလီဝေါရပ်ကွက်မှာရှိတဲ့ နေအိမ်တစ်အိမ်ဟာ ထမင်းချက်ရာကနေ ဂတ်အိုးပေါက်ကွဲပြီး နေအိမ်မီးလောင်ခဲ့တာ ဖြစ်တယ်လို့ ဖြစ်စဉ်သိရှိသူအမျိုးသားတစ်ဦးက ဆိုပါတယ်။
“ဂိတ်အိုးပေါက်ပြီး နေအိမ်မီးလောင်သွားတာ။ သုံးယောက်က လက်နဲ့ ခြေထောက်တွေမှာ ဒဏ်ရာရကြတယ်။ တစ်ယောက်က ခန္ဓာကိုယ်မှာ လောင်သွားတယ်” လို့ ပြောပါတယ်။
အဲဒီနေအိမ်မီးလောင်မှုကြောင့် အသက် ၂၈ နှစ်အရွယ်ရှိတဲ့ ကိုအောင်ကျော်ကျော်၊ အသက် ၂၉ နှစ်ရှိတဲ့ ကိုမျိုးလှိုင်ဝင်း၊ အသက် ၂၈ နှစ်ရှိပြီဖြစ်တဲ့ ကိုရှိုင်းထက်အောင်နဲ့ အသက် ၁၉ နှစ်ရှိတဲ့ ကိုစောရန်နိုင်တို့က မီးလောင်ဒဏ်ရာရရှိသွားခဲ့တယ်လို့ ဆိုပါတယ်။
နေအိမ်တစ်ခုလုံး မီးလောင်ပြာကျသွားတဲ့အချိန်မှာ နေအိမ်အတွင်းမှာရှိတဲ့ ပစ္စည်းအားလုံးလည်း မီးလောင်ဆုံးရှုံးသွားခဲ့တယ်လို့ ပြောပါတယ်။
ပြီးခဲ့တဲ့ စက်တင်ဘာလ ၄ရက်ကလည်း နမ့်ခမ်းမြို့နယ် ၁၂ မိုင်ကျေးရွာမှာ ကားတစ်စီးတိမ်းမှောက်သွားခဲ့တာကြောင့် နေအိမ် ၂ လုံးနဲ့ ကားတစ်စီး မီးလောင်ပျက်စီးခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
