ယာရူစိင်၊ စက်တင်ဘာ ၁၀ ရက်၊ ဝက်လက်
စစ်ကိုင်းတိုင်း ဝက်လက်မြို့နယ်ကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ ကလေးငယ် ၁ ဦးအပါအဝင် ၄ ဦး သေဆုံးခဲ့တယ်လို့ Wetlet Informational Network မှ တာဝန်ရှိသူတစ်ဦးက ရွှေဖီမြေကို ပြောပါတယ်။
မနေ့ စက်တင်ဘာ ၉ ရက် ညနေ ၆ နာရီခွဲဝန်းကျင်မှာ ဝက်လက်မြို့နယ် သစ်ဆိပ့်၊ အင်ဒေါင်း၊ ရုံပင်ကုန်း ၊မင်းကုန်း၊ နဘဲပင်လှ၊ တပ်သာရွာကို စစ်တပ်က ဗုံးကြဲတိုက်ခိုက်ခဲ့တာကြောင့် သေဆုံးခဲ့ကြတာဖြစ်ပြီး အဲဒီအပြင် ထိခိုက်ဒဏ်ရာရရှိသူ ၁၃ ဦးလည်း ရှိခဲ့ပါတယ်။
“ထိခိုက်ဒဏ်ရာရတဲ့အထဲက ကိုရင် ၁ ပါးလည်း ပါဝင်တယ်ဗျ။ ပြီးတော့ အမျိုးသမီးတွေလည်း ပါဝင်သလို အမျိုးသားတွေလည်း ထိခိုက်ဒဏ်ရာရတဲ့အထဲ ပါဝင်ပါတယ်။ သေဆုံးတဲ့ ၄ ဦးတော့ အမျိုးသားတွေပါပဲ” လို့ ၎င်းက ပြောပါတယ်။
ပြီးခဲ့တဲ့ ဩဂုတ်လ ၂၇ ရက် ညနေ ၅ နာရီခွဲဝန်းကျင်မှာလည်း ဝက်လက်မြို့နယ် ရုံပင်ကုန်းရွာရှိ စစ်ရှောင်တွေ နေထိုင်ကြတဲ့ ဘုန်းကြီးကျောင်းကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် စစ်ရှောင် ၄ ဦး သေဆုံးပြီး ၆ ဦး ဒဏ်ရာရရှိခဲ့ပါတယ်။
အလားတူ ပြီးခဲ့တဲ့ ဩဂုတ်လ ၁၁ ရက် နေ့လယ် ၂ နာရီဝန်းကျင်မှာလည်း စစ်ကိုင်းမြို့နယ် စစ်ကိုင်း-ဝက်လက် ခရိုင်ချင်းဆက် လမ်းပေါ်က တောင်ရင်းရွာအနီးရှိ စားသောက်ဆိုင်တစ်ဆိုင်မှာ ရပ်ထားကြတဲ့ ကားတန်းတွေကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ ၁၆ ဦး သေဆုံးပြီး ၂၀ ဦးထက်မနည်းလည်း ဒဏ်ရာရရှိခဲ့ပါတယ်။
ဒါ့အပြင် ဇူလိုင် ၁၇ ရက်ကလည်း ဝက်လက်မြို့အရှေ့ခြမ်းရှိ ရှားကွဲ၊ ငါးပတ်ချောင်းနဲ့ ရေလည်မော်ရွာကို စစ်တပ်က ဗုံးကြဲတိုက်ခိုက်ခဲ့တာကြောင့် ဒေသခံ ၂၁ ဦး သေဆုံးပြီး ၃၀ ဦးထက်မနည်း ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
