ယာရူစိင်၊ ဒီဇင်ဘာ ၁၄ ရက်၊ ဝက်လက်
စစ်ကိုင်းတိုင်း ဝက်လက်မြို့နယ်မှာ စစ်ရှောင်စခန်းတစ်ခုကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် စစ်ရှောင် ၄ ဦးသေဆုံးခဲ့ရပြီး ၁၀ ဦးနီးပါး ဒဏ်ရာရရှိခဲ့တယ်လို့ Wetlet Information Network မှ တာဝန်ရှိသူ ကိုမုန်တိုင်းက ရွှေဖီမြေကို ပြောပါတယ်။
မနေ့ ဒီဇင်ဘာ ၁၃ ရက် ည ၉ နာရီခွဲမှာ ဝက်လက်မြို့နယ် အရှေ့မြောက်ခြမ်း ထုံးဘိုရွာတောင်ဘက် သန်းကုန်းတောတိုက်အနီးမှာရှိတဲ့ စစ်ရှောင်စခန်းကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာ ဖြစ်ပါတယ်။
“သေဆုံးသူနဲ့ ထိခိုက်ဒဏ်ရာရသူ အကုန်လုံးက စစ်ရှောင်တွေပါ။ စစ်ရှောင်စခန်းကို ဗုံးကြဲသွားတာပါ”လို့ ကိုမုန်တိုင်းက ပြောပါတယ်။
စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် အသက် ၇၀ နှစ်အရွယ် ဦးခင်မောင်လွင်၊ အသက် ၃၄ နှစ်အရွယ် မသူဇာနွယ်၊ အသက်၂၆နှစ်အရွယ် တွတ်ပီနဲ့ အသက် ၄ နှစ်အရွယ် မအေးမြတ်သူဇာတို့ သေဆုံးခဲ့ပြီး နေအိမ် ၈ လုံးနီးပါးလည်း မီးလောင်ပျက်စီးခဲ့တာ ဖြစ်ပါတယ်။
ပြီးခဲ့တဲ့ ဒီဇင်ဘာ ၂ ရက် မနက်အစောပိုင်း ၁၂ နာရီ ၆ မိနစ်မှာလည်း ဝက်လက်မြို့နယ် နတ်မှော်ဦးရွာကို စစ်ကောင်စီတပ်က လေကြောင်းကနေ ပေါင် ၂၅၀ ဗုံး ၂ ကြဲချတိုက်ခိုက်ခဲ့လို့ ဒေသခံ ၅ ဦးသေဆုံးပြီး ၅ ဦးဒဏ်ရာရရှိခဲ့ပါတယ်။
စစ်ကောင်စီတပ်ဟာ ဝက်လက်မြို့နယ်အပါအဝင် စစ်ကိုင်းတိုင်းထဲက တော်လှန်ရေးတပ်တွေ ထိန်းချုပ်ထားတဲ့ နေရာတွေကို လေကြောင်းအပါအဝင် မြေပြင်စစ်ကြောင်းထိုးတာတွေ ထိုးစစ်ဆင် တိုက်ခိုက်တာတွေ ပြုလုပ်လျက် ရှိနေပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
