အိုက်ပွီး၊ မတ်လ ၂၇ ရက်၊ ပုဏ္ဏားကျွန်း
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် ပုဏ္ဏားကျွန်းမြို့နယ် အောင်ဖြူပြင်ရွာကို လေကြောင်းကနေ ဗုံးကြဲတိုက်ခိုက်လို့ စစ်ဘေးရှောင် မိသားစုဝင် ၃ ဦးအပါအဝင် ၄ ဦး သေဆုံးခဲ့ပြီး ၁၃ ဦး ထိခိုက်ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
မတ်လ ၂၅ ရက် ည ၇ နာရီမှာ စစ်ဘေးရှောင်အများစုနဲ့ အရပ်သား နေထိုင်တဲ့ အောင်ဖြူပြင်ရွာ ဘုန်းကြီးကျောင်းကို စစ်တပ်က ပေါင် ၅၀၀ ဗုံးသီးတစ်လုံးနဲ့ လေကြောင်းကနေ ဗုံးကြဲတိုက်ခိုက်ခဲ့တာပဲ ဖြစ်ပါတယ်။
“မိသားစုဝင် ၃ ဦးက ပွဲချင်းပြီး သေဆုံးသွားတယ်။ တစ်ယောက်ကတော့ ဆေးကုသမှု ခံယူနေရင်း ဒီနေ့ (မတ်လ ၂၆ ရက်) သေဆုံးတာပါ။ သူတို့တွေက ပုဏ္ဏားကျွန်းမြို့ကနေ စစ်ဘေးရှောင်ကြတဲ့သူတွေ ဖြစ်ပါတယ်” လို့ ပုဏ္ဏားကျွန်းမြို့နယ် ဒေသခံတစ်ဦးက ရွှေဖီမြေသို့ ပြောပါတယ်။
သေဆုံးသူတွေဟာ ပုဏ္ဏားကျွန်းမြို့ လိပ်ကုန်းပြင်ရပ်ကွက်က စစ်ဘေးရှောင်လာတဲ့ ဦးသန်းမောင် (၅၃ နှစ်)၊ ဇနီးဖြစ်သူ ဒေါ်မရီ (၄၅ နှစ်)၊ သားဖြစ်သူ ကိုမောင်သက်နိုင် (၁၉ နှစ်)နဲ့ ကိုရဲလင်းစိုး (၂၅ နှစ်)တို့ ဖြစ်ပါတယ်။
ဒါ့အပြင် အသက် ၂ နှစ်မှ ၁၅ နှစ်ကြား ကလေး ၅ ဦး၊ အမျိုးသမီး ၇ ဦးအပါအဝင် စစ်ဘေးရှောင် ၁၃ ဦး ထိခိုက်ဒဏ်ရာ ရရှိခဲ့ပြီး အဲဒီထဲမှာ ပြင်းထန်ဒဏ်ရာ ရရှိသူလည်း ပါဝင်တာကြောင့် အသက်အန္တရာယ် စိုးရိမ်ရသူ ပါဝင်နေပါတယ်။
လက်ရှိမှာ ထိခိုက်ဒဏ်ရာ ရရှိသူတွေကို လုံခြုံစိတ်ချရတဲ့ နေရာတွေမှာ ပြောင်းရွှေ့ထားပြီး ဆေးကုသမှု ပြုလုပ်ပေးနေပါတယ်။
စစ်အာဏာသိမ်းပြီး လေးနှစ်ကျော်အတွင်း နိုင်ငံတစ်ဝန်း စစ်တပ်ရဲ့ လေကြောင်း တိုက်ခိုက်မှုအပါအဝင် သတ်ဖြတ်မှုကြောင့် အရပ်သား ၆,၄၄၈ ဦး သေဆုံးခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း- AAPP က မတ်လ ၂၅ ရက်မှာ ထုတ်ပြန်ထားပါတယ်။
