လွေးထွေး၊ ဖေဖော်ဝါရီ ၁၈ ရက်၊ တန့်ယန်း
ရှမ်းမြောက် တန့်ယန်းမြို့နယ် နာစေကျေးရွာက မိသားစုဝင် ၄ ဦးဟာ ၈ လနီးပါးကြာတဲ့အထိ ပျောက်ဆုံးနေတယ်လို့ ဖြစ်စဉ်သိရှိသူ အမျိုးသားတစ်ဦးရဲ့ ပြောပြချက်အရ သိရပါတယ်။
အဲဒီမိသားစုဝင် ၄ ဦးဟာ ပြီးခဲ့တဲ့ ၂၀၂၄ ခုနှစ် ဇွန်လကတည်းက နာစေရွာကနေ ကလန့်ကဒေါရွာဘက် ကလေးကျောင်းတက်ဖို့ ခြေလျင်နဲ့ လာပို့ချိန် လမ်းတစ်ဝက်အရောက်မှာ အမျိုးသမီးတစ်ဦးနဲ့ အမျိုးသားတစ်ဦးက ဆိုင်ကယ် ၂ စီးနဲ့ ရွာကို ပြန်ပို့မယ်ဆိုပြီး ခေါ်သွားခဲ့တယ်လို့ နာစေရွာခံတစ်ဦးရဲ့ ပြောပြချက်ကို အထက်ပါ အမျိုးသားက ရွှေဖီမြေကို ပြန်ပြောပြပါတယ်။
“အပေါ်ရွာ(နာစေ)မှာ သူတို့နေတာကြာပြီ။ ၆ လပိုင်းရောက်တော့ ကျောင်းပြန်ဖွင့်မယ်ကြားပြီး သူတို့သားအကြီးကို ကျောင်း လာထားဖို့ ဆင်းလာတာ။ အဲအချိန် ခေါ်သွားခံရတာ။ အဲကတည်းက အဆက်အသွယ် မရတော့တာ။ ၈ လပိုင်းလောက်မှာ သူများတွေက လားရှိုးမှာ ပြန်တွေ့တယ် ပြောကြပေမဲ့ သူတို့အမျိုးတွေ သွားရှာကြတာ မတွေ့ခဲ့ဘူး”
အသက် ၂၀ ကျော်အရွယ် မိခင်ဖြစ်သူနဲ့ အသက် ၉ နှစ်အရွယ် မိုင်းအိုက်ဆွေ၊ အသက် ၂ နှစ်နဲ့ ၄ နှစ်အရွယ်သာ ရှိသေးတဲ့ မိုင်းအိုက်ဆွေရဲ့ မောင်လေးနဲ့ ညီမလေးတို့ ပျောက်ဆုံးခဲ့တာပဲ ဖြစ်ပါတယ်။
လက်ရှိအချိန်ထိ သတင်းအစအန မရသေးတာကြောင့် လူကုန်ကူးခံနေရမှာကို ဆွေမျိုးအသိုင်းအဝိုင်းတွေက စိုးရိမ်နေကြပြီး အဲဒီမိသားစုဝင်ကို တွေ့ရင် အကြောင်းကြားပေးဖို့ကို တောင်းဆိုထားပါတယ်။
အလားတူ ၂၀၂၅ ခုနှစ် နှစ်စအတွင်းမှာတင် စစ်ကောင်စီ ထိန်းချုပ်ထားတဲ့ ရှမ်းမြောက်က မြို့အပါအဝင် တိုင်းရင်းသား လက်နက်ကိုင်တပ် ထိန်းချုပ်ထားတဲ့ မြို့နယ်တွေမှာလည်း အခုလို မကြာခဏ အရပ်သား ပျောက်ဆုံးမှု ရှိနေပါတယ်။
