ခိုင်လေး၊ ဇွန်လ ၁ ရက်၊ စစ်ကိုင်း
စစ်ကိုင်းတိုင်း စစ်ကိုင်းမြို့ အမှတ် (၃၃) ခြေမြန်တပ်မ ဌာနချုပ်ကို Brave Warriors for Myanmar (BWM) နဲ့ ပူးပေါင်းမဟာမိတ်တပ်ဖွဲ့တွေက ရှော့တိုက်ဒုံး ၃ လုံးနဲ့ ပစ်ခတ်တိုက်ခိုက်ခဲ့တာကြောင့် တပ်တွင်းအချုပ်သား ၂ ဦး အပါအဝင် စစ်သား ၈ ဦး သေဆုံးပြီး ၆ ဦး ဒဏ်ရာရခဲ့ပါတယ်။
မနေ့ မေလ ၃၁ ရက်မှာ BWM နဲ့ ပူးပေါင်းမဟာမိတ်တပ်ဖွဲ့တွေက စစ်ကောင်စီရဲ့ ခြေမြန်တပ်မဌာနချုပ် (တပ်မ ၃၃) စခန်းကို BWM Mission 40 အနေနဲ့ ၁၀၇ မမ ရှော့တိုက်ဒုံးအသုံးပြုပြီး ပစ်ခတ်တိုက်ခိုက်ခဲ့တာ ဖြစ်တယ်လို့ BWM မှ တာဝန်ရှိသူတစ်ဦးက ရွှေဖီမြေကို ပြောပါတယ်။
”စကစ ထိပ်သီးတစ်ဦး တပ်မ (၃၃) ထဲ လာမယ်ဆိုတာ သတင်းရတာကြောင့် ဒီမစ်ရှင်ကို လုပ်ဆောင်ရတာပါ။ ပြီးရင် စကစ က စစ်ကိုင်းဘက်က ရွာတွေကို ဝင်စီးပြီး ပြည်သူတွေကို လူသားဒိုင်းအဖြစ် ဖမ်းဆီးနှိပ်စက်နေတာကြောင့် အခုလို BWM Mission 40 ကို ဖော်ဆောင်ရခြင်းဖြစ်တယ်”
တိုက်ခိုက်မှုအတွင်း ဗဟိုကင်း မီးလောင်ပျက်စီးသွားတာ၊ တပ်သုံး မော်တော်ယာဥ် ၂ စီး ပျက်စီးသွားတာနဲ့ လိုင်းခန်းတစ်ခန်း ရှော့တိုက်ဒုံးထိမှန်ကာ ပျက်စီးခဲ့ပါတယ်။
အဲဒီအပြင် မော်တော်ယာဥ်မှူးနဲ့ စစ်သည် ၃ ဦးလည်း ဒဏ်ရာအပြင်းအထန်ရရှိခဲ့ပြီး လိုင်းခန်းက ရဲမေ ၃ ဦးလည်း ဒဏ်ရာရရှိခဲ့တယ်လို့ BWM က ဒီနေ့ ဇွန်လ ၁ ရက်နေ့မှ ထုတ်ပြန်ထားပါတယ်။
ခြေမြန်တပ်မဌာနချုပ် (တပ်မ ၃၃) ဟာ နွေဦးတော်လှန်ရေးကာလတလျှောက် ဒေသခံတွေအပေါ် ညှင်းဆဲသတ်ဖြတ်ရာမှာ အရက်စက်ဆုံးတပ်အဖြစ် နာမည်ကြီးတဲ့ စစ်ကောင်စီရဲ့ လက်ရုံးတပ်ဖြစ်ပြီး လက်ရှိမှာလည်း (တပ်မ ၃၃) ရဲ့ ဒုတပ်မမှူး ဦးစီးက စစ်ကိုင်းမြို့နယ်ရှိ ကျေးရွာတွေထဲက ဒေသခံတွေကို ဖမ်းဆီးကာ လူသားဒိုင်းအဖြစ် လုပ်ခိုင်းပြီး စစ်ကြောင်းထိုးတာတွေ ရှိနေပါတယ်။
မြေပြင်စစ်ဆင်ရေးမှာ ပြည်သူ့တော်လှန်ရေး အင်အားစုတွေကို ရင်ဆိုင်နိုင်စွမ်းမရှိတော့ဘဲ ကျရှုံးမှုများနဲ့ ရင်ဆိုင်လာရတဲ့ စစ်ကောင်စီဟာ လေတပ်ကိုအားကိုးပြီး ဝေဟင်အသာစီးနဲ့ တော်လှန်ရေးအင်အားစုတွေကို တန်ပြန်တိုက်ခိုက်မှု ပြုလုပ်နေတဲ့အပြင် နိုင်ငံတစ်ဝန်းက အရပ်သားတွေကို ပစ်မှတ်ထား ဗုံးကြဲတိုက်ခိုက်တာတွေ ပိုမိုပြုလုပ်နေတယ်လို့ ဆိုပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
