ပျားကြီး၊ ဖေဖော်ဝါရီ ၁ ရက်၊ ကနီ
စစ်ကိုင်းတိုင်း ကနီမြို့နယ်မှာရှိတဲ့ ကျေးရွာပေါင်း ၂၀ က ကလေးငယ် ၃,၃၀၀ ကို သန်ချဆေး တိုက်ကျွေးခဲ့တယ်လို့ စစ်ဘေးရှောင်တွေကို ကူညီပေးနေသူက ပြောပါတယ်။
စစ်ကောင်စီရဲ့ လက်ချက်နဲ့ နေရပ်စွန့်ခွာထွက်ပြေးနေရတဲ့ စစ်ဘေးရှောင်တွေထဲ သန်ချဆေး တိုက်ကျွေးဖို့ လိုအပ်တဲ့ ကလေးသူငယ်ပေါင်း ၃ သောင်းနီးပါး ရှိတဲ့အထဲမှာ ဆေးဝါးရရှိမှု အခက်အခဲကြောင့် ပြည်သူ့အခြေပြု စာသင်ကျောင်းမှာ တက်ရောက်နေသူတွေကိုပဲ လတ်တလော တိုက်ကျွေးနိုင်ခဲ့တာ ဖြစ်ပါတယ်။
“ဒါက ကလေးအကုန် မဟုတ်သေးပါဘူး။ အလှူငွေနဲ့ ဆေးဝယ်ယူရရှိမှုအပေါ် မူတည်ပြီး အရေးပေါ် လိုအပ်နေတဲ့ နေရာတွေကိုပဲ ဦးစားပေး တိုက်လိုက်တာပါ” လို့ စစ်ဘေးရှောင်တွေအတွက် ပညာရေးနဲ့ ကျန်းမာရေးကဏ္ဍမှာ ကူညီပေးနေသူတစ်ဦးက ပြောပါတယ်။
လက်ရှိအချိန်မှာ သန်ချဆေးဈေးနှုန်း မြှင့်လာပြီး ဝယ်ယူရ ခက်ခဲမှုကြောင့် ဒေသတွင်းမှာရှိတဲ့ စစ်ဘေးရှောင် ကလေးငယ်စုစုပေါင်းရဲ့ ၂၀ ရာခိုင်နှုန်းနီးပါးကိုပဲ ဆေးတိုက်ကျွေးနိုင်သေးတယ်လို့ ကူညီပေးနေသူတွေက ပြောဆိုပါတယ်။
၆ လတစ်ကြိမ် ပုံမှန်တိုက်ကျွေးရတဲ့ သန်ချဆေး ဈေးနှုန်းတွေဟာ ပြီးခဲ့တဲ့ နှစ်တွေမှာ တစ်လုံးကို ကျပ် ၂၀၀ ကနေ ၃၀၀ ကြားသာ ရှိခဲ့ပေမဲ့ လက်ရှိမှာတော့ တစ်လုံးကို ကျပ် ၅၀၀ ဝန်းကျင် ရှိနေတာကြောင့် ပြည်တွင်းပြည်ပ အလှူရှင်တွေဆီက အလှူငွေ ရရှိမှုအပေါ် မူတည်ပြီး ဆေးဝယ်ယူ တိုက်ကျွေးခဲ့တာဖြစ်တယ်လို့ ကနီမြို့နယ် နွေဦးတော်လှန်ရေးသပိတ် အင်အားစုရဲ့ အဖွဲ့ဝင်တစ်ဦးက ပြောပါတယ်။
အခုလို ကလေးငယ်တွေအတွက် သန်ချဆေး တိုက်ကျွေးမှုကို ကနီမြို့နယ် နွေဦးတော်လှန်ရေး သပိတ်အင်အားစု၊ ပြည်သူ့အခြေပြု ကျောင်းနဲ့ CDM ကျန်းမာရေးဝန်ထမ်းက ပူးပေါင်းလုပ်ဆောင်ခဲ့ကြတာလည်း ဖြစ်ပါတယ်။
