ရွှေဖီမြေ၊ မတ်လ ၂၃ ရက်၊ အင်းတော်
စစ်ကိုင်းတိုင်း အင်းတော်မြို့နယ်နဲ့ ကသာမြို့နယ်အစပ် ပင်လွတ်ရွာအနီးမှာ စစ်ကောင်စီတပ်နဲ့ ကချင်တပ်မတော် KIA၊ KPDF၊ ကသာခရိုင် တပ်ရင်း (၁)၊ မိုးတားတိုက်နယ် ပကဖ နဲ့ ကသာမြို့နယ် ပကဖ ပူးပေါင်းအဖွဲ့တို့ တိုက်ပွဲဖြစ်ပွားခဲ့တာကြောင့် စစ်ကောင်စီတပ်သား ၃၃ ဦး သေဆုံးခဲ့ပြီး တော်လှန်ရေးတပ်ဘက်က ၂ ဦး ကျဆုံးခဲ့ရကြောင်း NUG ရဲ့ ကာကွယ်ရေးဝန်ကြီးဌာနက မနေ့ မတ်လ ၂၂ ရက်မှာ ထုတ်ပြန်ထားပါတယ်။
ပြီးခဲ့တဲ့ မတ်လ ၁၅ ရက်မှာ ခမရ-၃၀၉ မှ ထွက်လာတဲ့ စစ်ကြောင်းကို ကသာမြို့ရှိ ပန်းတောင်ကြီး၊ ပန်းတောင်လေးတောင်မှာ တော်လှန်ရေးတပ်တွေက တိုက်ခိုက်ခဲ့တာကြောင့် အင်အား (၁၅၀) ဝန်းကျင်ပါတဲ့ စစ်ကောင်စီတပ်သား ၃၃ ဦး သေဆုံးခဲ့ပြီး ၁၀ ဦး ဒဏ်ရာရတာနဲ့ ၃၁ ဦးကို အရှင်ဖမ်းဆီးရမိကြောင်း ဆိုထားပါတယ်။
စစ်ကောင်စီတပ် ထိခိုက်သေဆုံးတဲ့အပြင် MA-1 (၂၉) လက်၊ MA-2 (၆) လက်၊ MA-3 (၁၂) လက်၊ MA-4 (၃) လက်၊ MA-11 (၁) လက်၊ MA-15 (၁) လက်၊ Anti Drone Gun (၁) လက်၊ MA-10လက် စတဲ့ လက်နက်အမျိုးအစားပေါင်း ၅၄ လက်ကိုလည်း သိမ်းဆည်းရမိခဲ့ပါတယ်။
ဒါ့အပြင် ဗုံးသီး (၃၇) လုံး၊ MA ကျည် (၈၀၀၀) တောင့်၊ MA-15 ကျည် (၂၀၀၀) တောင့်၊ ၆၀ မမ ဗုံးသီး (၁၇) လုံး၊ ကျည်အိမ် (၁၁၃) ခု၊ ကျောပိုး Jammer (၁) ခု၊ ဆက်သွယ်ရေးစက် (၁) လုံး၊ အထိုင်ဖုန်း (၁) လုံး၊ ကျည်ကာဦးထုပ် (၁၂) လုံးကိုလည်း သိမ်းဆည်းရမိခဲ့တယ်လို့ ဖော်ပြထားပါတယ်။
NUG ရဲ့ ကာကွယ်ရေးဝန်ကြီးဌာနဟာ လွန်ခဲ့တဲ့ ၂၀၂၁ ခုနှစ် မေလ ၅ ရက်ကတည်းက ပြည်သူ့ကာကွယ်ရေးတပ် PDF ကို စတင်ဖွဲ့စည်းခဲ့ပြီး ၂၀၂၁ စက်တင်ဘာ ၇ ရက်မှာတော့ စစ်အာဏာရှင်ဖြုတ်ချရေးအဖြစ် တစ်နိုင်ငံလုံး ခုခံတွန်းလှန်စစ်ကို စတင်ခဲ့တာဖြစ်ပါတယ်။
