ရွှေဖီမြေ၊ ဇန်နဝါရီ ၃၀ ရက်၊ တာချီလိတ်
စစ်ကောင်စီတပ် ထိန်းချုပ်ထားတဲ့ ရှမ်းအရှေ့ တာချီလိတ်မြို့မှာ အလုပ် လုပ်ဖို့သွားတဲ့ ရှမ်းမြောက်က အမျိုးသမီး ၃ ဦးကို စစ်ကောင်စီတပ်က ဖမ်းဆီးခဲ့ကြောင်း မိသားစုဝင်နဲ့ နီးစပ်သူ အမျိုးသမီးရဲ့ ပြောပြချက်အရ သိရပါတယ်။
ဇန်နဝါရီ ၂၈ ရက် ည ၈ နာရီ ဝန်းကျင်မှာ တာချီလိတ်မြို့ ညဈေးတန်းအနီးမှာ အလုပ်ရှင်လာကြိုဖို့ စောင့်နေတဲ့ တန့်ယန်း၊ မိုင်းရယ်နဲ့ ကျောက်မဲမြို့နယ်က အသက် ၂၀ ကျော်အရွယ် အမျိုးသမီး ၃ ဦးကို စစ်ကောင်စီတပ်က ကင်းလှည့်ချိန် ခေါ်သွားခဲ့တာ ဖြစ်ပါတယ်။
ကျောက်မဲမြို့နယ်မှ အမျိုးသမီးနဲ့ နီးစပ်သူတစ်ဦးက “သူတို့က မြဝတီမှာ အလုပ်အတူလုပ်ကြတဲ့ သူငယ်ချင်းတွေပါ။ တာချီလိတ်မှာ အလုပ်လုပ်မယ်ဆိုပြီး အလုပ်ရှင်နဲ့ ဆက်သွယ်ပြီး သွားတာ။ နောက်ဆုံး အဲမှာရောက်ကြောင်းတော့ ပြောလာတယ်။ အိမ်ရှင်လာကြိုမယ်တဲ့” လို့ ပြောပါတယ်။
ဒီနေ့ ဇန်နဝါရီ ၃၀ ရက် မနက်မှာတော့ မိသားစုဝင်တွေက ဆက်သွယ်ခဲ့ပေမဲ့ ဖမ်းခံနေရကြောင်းသာ ပြောလာတယ်လို့ ဆိုပါတယ်။
အဲအနီးဝန်းကျင်ရှိ နောက်ထပ် သတင်းအရင်းအမြစ် အမျိုးသားတစ်ဦးလည်း “အဲည လမ်းဘေးက အမျိုးသမီး ၃ယောက်ကို စကစက ကားပေါ်တင်ခေါ်တာတော့ တွေ့တယ်။ ကျနော်ထင်တာက သူတို့ လမ်းကြုံလိုက်စီးတာလားလို့” လို့ ပြောပါတယ်။
ဒါ့အပြင် ၎င်းအမျိုးသမီး ၃ ဦး ပြန်လွှတ်နိုင်ဖို့ စစ်ကောင်စီတပ်ရဲ့ ဗိုလ်ကြီးအဆင့်ရှိသူက ငွေ သိန်း ၁၀၀ ပေးဖို့ ပြောဆိုတဲ့ ကောလဟလသတင်းတွေ ထွက်နေပေမဲ့ အချက်အလက်အတိအကျသိရဖို့ ရွှေဖီမြေက စုံစမ်းနေဆဲ ဖြစ်ပါတယ်။
၎င်းအမျိုးသမီးတွေဟာ အလုပ်လုပ်ဖို့သာ သွားတာဖြစ်ပြီး နိုင်ငံရေးနဲ့ ပတ်သက်တာ မရှိတာကြောင့် အမြန်ဆုံးပြန်လွှတ်စေချင်ကြောင်း ဖမ်းဆီးခံရတဲ့ ကျောက်မဲမြို့က အမျိုးသမီးနဲ့ နီးစပ်သူက တောင်းဆိုထားပါတယ်။
အလားတူ ပြီးခဲ့တဲ့ ဇန်နဝါရီ ၂၄ ရက် မနက်ကလည်း တာချီလိတ်မြို့ ဆန်ဆိုင်းရပ်ကွက် မြို့ပတ်လမ်းအနီးမှာ အသက် ၃၀ ကျော်အရွယ် အမျိုးသမီးတစ်ဦးကို ကားစီးပြီး သေနတ်အတို ကိုင်ထားတဲ့ အမျိုးသား ၄ ဦးက ပြန်ပေးဆွဲခဲ့တဲ့ ဖြစ်စဉ်ဖြစ်ပွားခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
