ယာရူစိင်၊ အောက်တိုဘာ ၇ ရက်၊ သီပေါ
တအာင်းတပ်မတော်- PSLF/TNLA ထိန်းချုပ်ထားတဲ့ သီပေါမြို့ထဲ စစ်ကောင်စီတပ်က လေကြောင်းကနေ ထပ်မံ ဗုံးကြဲတိုက်ခိုက်ခဲ့တာကြောင့် ကလေးငယ်အပါအဝင် ၃ ဦး ဒဏ်ရာ ရရှိခဲ့တယ်လို့ သီပေါမြို့ခံ အမျိုးသားတစ်ဦးက ရွှေဖီမြေကို ပြောပါတယ်။
မနေ့ အောက်တိုဘာ ၆ ရက် သီတင်းကျွတ် လပြည့်နေ့ မနက် ၇ နာရီ ၄၂ မိနစ်မှာ သီပေါမြို့ မိုက်ခရိုဝေ့ပ် ဆက်သွယ်ရေးရုံးထဲ စစ်တပ်က ပေါင် ၂၅၀ ဗုံး ၁ လုံး ကြဲချတိုက်ခိုက်ခဲ့ပါတယ်။
“ဆက်သွယ်ရေးရုံးနဲ့ ဒေသခံ နေအိမ် ၁ လုံးတော့ ပျက်စီးသွားတယ်။ တစ်ယောက်တော့ ခြေထောက် ထိတယ်။ ဒဏ်ရာရတဲ့အထဲ ကလေးငယ်လည်း ပါဝင်တယ်” လို့ သီပေါမြို့ခံ အမျိုးသားတစ်ဦးက ပြောပါတယ်။
စစ်တပ်ရဲ့ ဗုံးကြဲတိုက်ခိုက်မှုကြောင့် အသက် ၁ နှစ်အရွယ် ကလေးငယ်နဲ့ အမျိုးသား ၂ ဦး ထိမှန်ဒဏ်ရာ ရရှိခဲ့ပါတယ်။
မနေ့ အောက်တိုဘာ ၆ ရက်မှာတင် စစ်တပ်ဟာ နမ္မတူမြို့လယ်ထဲ ဗုံးကြဲတိုက်ခိုက်ခဲ့တာကြောင့် နေအိမ် ၇ လုံးထက်မနည်း ပြာကျပျက်စီးခဲ့ပြီး ၁၀ လုံးထက်မနည်းက အနည်းငယ် ပျက်စီးခဲ့ပါတယ်။
ပြီးခဲ့တဲ့ ဇူလိုင် ၄ ရက်ကနေ အနေ့ အောက်တိုဘာ ၆ ရက်အထိ သီပေါမြို့ကို စစ်တပ်က လေကြောင်းကနေ ၁၄ ကြိမ် ဗုံးကြဲတိုက်ခိုက်ခဲ့ပြီ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
