လွေးထွေး၊ မတ်လ ၄ ရက်၊ တန့်ယန်း
ရှမ်းမြောက် တန့်ယန်းမြို့နယ်မှာ တောမီးရှို့တာကြောင့် ကလေး ၁ ဦးအပါအဝင် ၃ ဦး မီးလောင်ဒဏ်ရာရခဲ့တယ်လို့ ဖြစ်စဉ်သိရှိသူ အမျိုးသမီးတစ်ဦးရဲ့ ပြောပြချက်အရ သိရပါတယ်။
မနေ့ မတ်လ ၃ ရက် နေ့လယ် ၁၂ နာရီ ဝန်းကျင်မှာ တန့်ယန်းမြို့နယ် ဟိုတာအုပ်စု ကောင်းရုံးကျေးရွာအနီးမှာ တောမီးရှို့တာကြောင့် ကောင်းညွှန့်ရွာက တအာင်းကလေး ၁ ဦး အပါအဝင် ၃ ဦး မီးလောင်ဒဏ်ရာရခဲ့တာ ဖြစ်ပါတယ်။
ဖြစ်စဉ်သိရှိသူ တန့်ယန်းမှ အမျိုးသမီးတစ်ဦးက “အဲတောက အရင်နှစ်ကတည်းက ရှမ်းနဲ့ တအာင်း ပြသာနာဖြစ်ခဲ့တယ်။ တအာင်းက တောင်ယာလုပ်ချင်တယ်။ ရှမ်းက သစ်လုပ်ချင်တာ။ အဲတာကို မနေ့က ရှမ်းတွေက အဲတောကို မီးရှို့လိုက်တာ။ အဲတောထဲ လူရှိတာကို သူတို့က မသိဘူးတဲ့” လို့ ရွှေဖီမြေကို ပြောပါတယ်။
မီးလောင်ဒဏ်ရာရသွားသူတွေဟာ အသက် (၅၀) ဝန်းကျင်အရွယ် အမျိုးသား၂ ဦးနဲ့ အသက် ၁၀ နှစ် ကျော်အရွယ် ကလေးတစ်ဦးတို့ဖြစ်ပြီး ရွာကနေ တန့်ယန်းမြို့အထိ ကားလမ်းမပေါက်တာကြောင့် လက်ရှိမှာ ရွာထဲမှာသာ ဆေးကုသမှု ခံယူနေရတယ်လို့ ဆိုပါတယ်။
တောမီးရှို့သူတွေဟာ လွယ်ဆိုင်ကျေးရွာအုပ်စု နာဟုတ်ကျေးရွာက ဒေသခံတွေဖြစ်တယ်လို့ ပြောဆိုထားကြပေမယ့် ရွှေဖီမြေအနေနဲ့ကတော့ သီးခြားအတည်မပြုနိုင်သေးပါဘူး။
တန့်ယန်းမြို့နယ်မှာ စစ်ကောင်စီတပ်အပြင်၊ ဝ ပြည်သွေးစည်းညီညွတ်ရေးတပ်မတော် UWSA နဲ့ ရှမ်းပြည်တိုးတက်ရေးပါတီ SSPP တို့က လှုပ်ရှားနေတာလည်း ဖြစ်ပါတယ်။
