မိုင်းဖိူမ်းဆငဲ၊ အောက်တိုဘာ ၁၈ ရက်၊ နမ့်ဆန်
တအာင်းတပ်မတော်- PSLF/TNLA ထိန်းချုပ်ထားတဲ့ နမ့်ဆန်မြို့နယ် ကွမ်ဟယ်ကျေးရွာမှာ စစ်ကောင်စီတပ်ရဲ့ ဗုံးကြဲတိုက်ခိုက်မှုကြောင့် သေဆုံးသူ အမျိုးသမီး ၃ ဦး ထပ်တိုးလာတဲ့အတွက် သေဆုံးသူ ၆ ဦးအထိ ရှိလာတယ်လို့ အုပ်ချုပ်ရေး တာဝန်ရှိသူတစ်ဦးက ရွှေဖီမြေကို ပြောပါတယ်။
“သေဆုံးသွာတာကတော့ ၆ ဦးရှိတယ်။ အမျိုးသားတစ်ဦးနဲ့ အမျိုးသမီး ၅ ဦး။ ဒဏ်ရာရတဲ့သူက အဖွားတစ်ဦး။ သူ့ကိုတော့ ဆေးရုံ ပို့ထားတယ်။”
စစ်ကောင်စီတပ်ဟာ ဒီနေ့ အောက်တိုဘာ ၁၈ ရက် ညပိုင်း ၈ နာရီခွဲအချိန်မှာ ကွမ်ဟယ်ရွာအလယ်ထဲ ပေါင် ၅၀၀ ဗုံးကြဲချတိုက်ခိုက်ခဲ့တာပဲ ဖြစ်ပါတယ်။
ကွမ်ဟယ်ရွာထဲ ကြဲချပြီးနောက် ကျောက်မဲနဲ့ မိုင်းငေါ့ကြားရှိ ၁၁ မိုင်ရွာက ဘာသာရေးအဆောက်အအုံးထဲကိုလည်း ပေါင် ၅၀၀ ဗုံးကြဲချတိုက်ခိုက်ခဲ့တာ ကြောင့် ဘုန်းကြီးတစ်ပါး ပြင်းထန်ဒဏ်ရာ ရရှိခဲ့ရပါတယ်။
PSLF/TNLA ထိန်းချုပ်ထားတဲ့ ဒေသတွေကိုအောက်တိုဘာလအတွင်း စစ်ကောင်စီတပ်က လေကြောင်းကနေ အဆက်မပြတ် ဗုံးကြဲတိုက်ခိုက်မှု ပြုလုပ်ခဲ့ပြီး ရွှေဖီမြေက ရရှိထားတဲ့ အချက်အလက်အရ တိုက်ခိုက်မှုကြောင့် သေဆုံးသူ ၄၂ ဦး၊ ဒဏ်ရာရသူ ၄၀ ဦးအထိ ရှိလာပါတယ်။
တိုက်ခိုက်မှုတွေကြောင့် နမ့်ဆန်နဲ့ နမ္မတူ ဒေသခံအများစုဟာ တောတောင်၊ နီးစပ်ရာနဲ့ လားရှိုးမြို့နယ်ဘက် တိမ်းရှောင်နေကြရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
