မိုင်းပန်ပျော်၊ မေလ ၁ ရက်၊ ကွတ်ခိုင်
တအာင်းတပ်မတော် ထိန်းချုပ်ထားတဲ့ ကွတ်ခိုင်မြို့နယ် ဟိုနောင်အုပ်စု ကုန်းချမ်းရွာမှာ မီးသွေး သွားထုတ်တဲ့ အမျိုးသား ၃ ဦး မိုးကြိုး ပစ်ခံရပြီး သေဆုံးသွားတယ်လို့ ရွှေဖီမြေက စုံစမ်းသိရှိရပါတယ်။
ဖြစ်စဉ်ဟာ ပြီးခဲ့တဲ့ ဧပြီ ၂၈ ရက် မနက် ၈ နာရီခွဲကျော်က ၎င်းတို့ ၃ ယောက်ဟာ မီးသွေး သွားထုတ်နေစဉ် မိုးကြိုး ပစ်ခံရပြီး သေဆုံးတာလို့ ကွတ်ခိုင်မြို့ခံ အမျိုးသားတစ်ဦးက ရွှေဖီမြေကို ပြောပါတယ်။
“သူတို့ ၃ ယောက်က မီးသွေးထုတ်ဖို့ တောထဲ သွားတာ။ အဲအချိန် မိုးကော လေကော ကြီးတယ်။ အဲဒါကြောင့် မိုးကြိုး ပစ်သွားတာ။ အဲနောက် ကလေးတွေက သူတို့ဆီ ထမင်း သွားပို့တာ ဟိုမှာရောက်တော့ သူတို့သုံးယောက်က အသက် မရှိတော့ဘူး”
မိုးကြိုး ပစ်ခံရလို့ သေဆုံးသွားသူကတော့ ဦးလွင်ခိုင် (၆၂ နှစ်)၊ ဦးအိုက်လွင် (၃၆ နှစ်)၊ ဦးအိုက်မွန်း (၃၀ နှစ်)တို့ ဖြစ်တယ်လို့ ၎င်းက ဆက်ပြောပါတယ်။
ကွတ်ခိုင်မှာ အခုလို မိုးကြိုး ပစ်ခံရပြီး ၃ ဦးစလုံး သေဆုံးတဲ့ဖြစ်စဉ်ဟာ မကြုံစဖူးဖြစ်စဉ် ဖြစ်တယ်လို့ ဒေသခံတွေက ပြောပါတယ်။
အလားတူ ဧပြီ ၂၉ ရက်မှာလည်း လားရှိုးမြို့နယ် မိုင်းယော်တိုက်နယ် ရွာသစ်ရွာမှာ မိုးကြိုး ပစ်ခံရတဲ့ အမျိုးသမီးတစ်ဦး ဒဏ်ရာရခဲ့ပြီး လေပြင်းမုန်တိုင်း တိုက်ခတ်မှုကြောင့် နေအိမ် ၇ အိမ်လည်း ပျက်စီးခဲ့ပါတယ်။
