ခိုင်လေး၊ မတ်လ ၂၀ ရက်၊ မြောင်
စစ်ကိုင်းတိုင်း၊ မြောင်မြို့နယ်မှာ စစ်ကောင်စီတပ်က စက်တပ်လေထီးနဲ့ လက်နက်ကြီး ဗုံးကြဲ တိုက်ခိုက်တာကြောင့် အမျိုးသား ၃ ဦးနဲ့ အမျိုးသမီး ၁ ဦး သေဆုံးပြီး နောက်ထပ် အမျိုးသမီး ၁ ဦး ဒဏ်ရာရ ခဲ့တယ်လို့ မြောင်မြို့နယ် ပြည်သူ့ကာကွယ်ရေးတပ်ဖွဲ့မှ ကိုနွေဦးက ရွှေဖီမြေကို ပြောပါတယ်။
မနေ့ မတ်လ ၁၉ ရက် ညနေ ၄ နာရီမှာ မြောင်မြို့ပေါ်ရှိ စစ်ကောင်စီရဲ့ တပ်စခန်းကနေ လက်နက်ကြီး လှမ်းပစ်ခတ်ခဲ့တာကြောင့် မြောင်မြို့တောင်ဘက်က လှေတင်ဦးရွာမှ အမျိုးသား ၁ ဦးနဲ့ မြောင်မြို့မြောက်ဘက် ကျည်ကုန်းရွာက အမျိုးသား ၁ ဦး သေဆုံးသွားတာအပြင် နောက်ထပ်အဖွားအိုနဲ့ သူ့သားလည်း သေဆုံးသွားခဲ့တယ်လို့ ဆိုပါတယ်။
ကိုနွေဦးက “စစ်တပ်က နောက်စက်တပ်လေထီးတွေနဲ့ ပြန်လာကြဲတယ်။ ပြည်သူတွေရဲ့ နေအိမ် နှစ်လုံးပေါ်ကျပြီး မီးလောင်ပြာကျသွားတယ်။ နောက်ထပ်မီးကူးတာနဲ့ဆို ၅ အိမ်ပေါ့။ နေအိမ်ထဲမှာ နေတဲ့ အသက် ၈၀ အဖွားအိုတစ်ယောက်က ခန္ဓာကိုယ် တစ်ပိုင်းဆီဖြစ်သွားတယ်။ သူ့သားကလည်း အဲလိုဘဲ ခန္ဓာကိုယ် အပိုင်းတွေဖြစ်ပြီး သေသွားတယ်။ သူ့သမီးကတော့ ခြေလက်တွေ ပျက်သွားတယ်” လို့ ပြောပါတယ်။
ဒီနေ့ မတ်လ ၂၀ ရက် မနက်ပိုင်းမှာလည်း မြောင်မြို့ ပတ်ပတ်လည်ကို စစ်ကောင်စီက လက်နက်ကြီးတွေနဲ့ ရမ်းသမ်းပစ်ခတ်တာတွေ ပြုလုပ်ပြီး အင်အားအလုံးအရင်းတွေနဲ့ မြို့ပတ်ပတ်လည်ကို ကာထားတာတွေ ရှိ တယ်လို့ ဆိုပါတယ်။
မြောင်မြို့အနီးနားရွာက ဒေသခံတွေအနေနဲ့ စက်တပ်လေထီးနဲ့ လက်နက်ကြီးအန္တရာယ်တွေ ကင်းဝေးဖို့ တိမ်းရှောင်ပြီး နေထိုင်ကြဖို့လည်း မြောင်မြို့နယ် ပြည်သူ့ကာကွယ်ရေးနဲ့ လုံခြုံရေးအဖွဲ့က အသိပေး ပြောဆိုထားပါတယ်။
ပြီးခဲ့တဲ့ မတ်လ ၁၂ ရက်က မြောင်မြို့နယ် ပန်းညိုရွာကို စစ်ကောင်စီတပ်ရဲ့ ရေတပ်၊ ကြည်းတပ် တို့ ပူးပေါင်းပိတ်ဆို့ပြီး ညနေပိုင်းအချိန်လောက်မှာပဲ ရွာလုံးကျွတ်နီးပါး မီးရှို့ဖျက်စီးခဲ့ပါတယ်။
