လွေးဇွန်မိုး၊ ဇန်နဝါရီ ၁၇ ရက်၊ ကျောက်ဂူ
ရှမ်းတောင် ရပ်စောက်မြို့နယ် ကျောက်ဂူဒေသ လွယ်ဟောင်ရွာမှာ စစ်ကောင်စီတပ်က လေကြောင်းနဲ့ ဗုံးကြဲလို့ ဒေသခံ ၃ ဦး သေဆုံးပြီး ၁၃ ဦး ဒဏ်ရာ ရခဲ့တယ်လို့ ဓနုတပ်တော်- DPLA က ဒီနေ့ ဇန်နဝါရီ ၁၇ ရက်မှာ ထုတ်ပြန်လာပါတယ်။
မနေ့ ဇန်နဝါရီ ၁၆ ရက် တစ်ရက်အတွင်း Y12 လေယာဥ်နဲ့ ဗုံးအလုံးရေ ၅၀ ကျော် ကြဲချတိုက်ခိုက်ခဲ့လို့ ဒေသခံ အမျိုးသမီး ၂ ဦးနဲ့ အမျိုးသား ၁ ဦး သေဆုံးပြီး ကလေး ၁ ဦးအပါအဝင် ဒေသခံ ၁၃ ဦး ထိခိုက်ဒဏ်ရာရခဲ့တယ်လို့ ဆိုပါတယ်။
DPLA ရဲ့ ပြောရေးဆိုခွင့်ရှိသူက “မနေ့ကတော့ ကျောက်ဂူမှာ တိုက်ပွဲဖြစ်တဲ့အနေအထား ရှိတယ်ပေါ့လေ။ အဒီမှာက စစ်ကောင်စီဘက်က Y-12 နဲ့ လွယ်ဟောင်မှာကို သူ့တိုလေယာဥ်နဲ့လာချတာပေါ့လေနော်။ ဒီနေ့အခြေအနေကတော့ ကျနော် မသိရသေးဘူး” လို့ ပြောပါတယ်။
လက်ရှိမှာတော့ ဒဏ်ရာရတဲ့ ဒေသခံတွေကို DPLA တပ်က ဆေးကုသပေးနေတယ်လို့ ထုတ်ပြန်ချက်မှာ ဖော်ပြထားပါတယ်။
ပြီးခဲ့တဲ့ ဇန်နဝါရီ ၁၅ ရက်မှာလည်း စစ်တပ်ရဲ့ လက်နက်ကြီးကြောင့် ကျောက်ဂူက အရပ်သားတစ်ဦး ဒဏ်ရာ ရခဲ့ပြီး ဇန်နဝါရီ ၁၄ ရက်ကလည်း စစ်ကောင်စီတပ်ရဲ့ လက်နက်ကြီးကြောင့် ကျောက်ဂူဒေသရှိ နေအိမ် ၂ လုံး မီးလောင်ပျက်စီးခဲ့ပါတယ်။
ပြီးခဲ့တဲ့ ဇန်နဝါရီ လဆန်းပိုင်းကစပြီး ကျောက်ဂူဒေသမှာ စစ်တပ်နဲ့ DPLA တို့အကြား တိုက်ပွဲ ဖြစ်ပွားခဲ့တာဖြစ်ပြီး တိုက်ပွဲ ပြင်းထန်နေတာ ၂ ပတ်နီးပါး ရှိနေပြီဖြစ်ပါတယ်။
