လွေးဇွန်မိုး၊ ဖေဖော်ဝါရီ ၄ ရက်၊ ကန့်ဘလူ
စစ်ကောင်စီတပ်က ဒရုန်းနဲ့ ဗုံးကြဲလို့ စစ်ကိုင်းတိုင်း ကန့်ဘလူမြို့နယ် ငါးရာနဲရွာက ဒေသခံ ၃ ဦး သေဆုံးပြီး ၅ ဦး ဒဏ်ရာ ရခဲ့တယ်လို့ ကန့်ဘလူခရိုင် တပ်ရင်း(၄)က မနေ့ ဖေဖော်ဝါရီ ၃ ရက်မှာ ထုတ်ပြန်ထားပါတယ်။
မနေ့မနက် ၁၀ နာရီမှာ စစ်တပ်က ငါးရာနဲ၊ ဖလံချိုင်ရွာ၊ သရက်ကောင်းရွာ၊ ရင်ဂါတ်ကုန်းရွာ၊ လက်ထုတ်ကုန်းရွာနဲ့ ပေကြီးရွာတို့ကို ဒရုန်းနဲ့ ဗုံးကြဲတိုက်ခိုက်ခဲ့တာလို့ ဆိုပါတယ်။
“ဒရုန်း ဗုံးသီးတွေကတော့ နေ့တိုင်းလိုလို ချနေတာပေါ့နော်။ အဲလိုတော့ရှိတယ်။ ရွာတွေ တော်တော်များများက ပြည်သူတွေကတော့ ရှောင်နေကြရတာ။ သူတို့က ရွာတွေထဲကို ဒီအတိုင်း ချနေတာ။ ဒရုန်းဗုံးသီးက။ ပြည်သူတွေ ထိတာများတာ။ ဒီလိုတွေ ဖြစ်နေတာပေါ့” လို့ မြေပြင်အခြေအနေ သိရှိသူ အမျိုသမီးတစ်ဦးက ပြောပါတယ်။
စစ်တပ်က စစ်ကြောင်းထိုးပြီး ကန့်ဘလူမြို့နယ်ထဲက ကျေးရွာတွေကို မီးရှို့ဖျက်ဆီးတာရှိသလို ဒရုန်းနဲ့လည်း နေ့စဥ်လိုလို ဗုံးကြဲတာ ရှိနေတယ်လို့ အထက်ပါ အမျိုးသမီးက ဆက်ပြောပါတယ်။
“စစ်ကြောင်းက မီးဝင်ရှို့နေတဲ့ စစ်ကြောင်းတွေရှိတယ်။ တိုက်ပွဲ ဖြစ်တာကတော့ ဟိုနေ့ကတော့ နည်းနည်း ထိတွေ့မှု ဖြစ်ပြီးတော့ ထွက်လာတဲ့စစ်ကြောင်း ဝင်ပစ်တာရှိတယ်။ အဲဒါကြောင့် တောက်လျှောက် ထိုးနေသလား၊ အဲဒါကြောင့် ဝင်ရှို့သလားတော့ မသိဘူးပေါ့နော် မီးက။ ဒါပေမဲ့ ဒရုန်းဗုံးသီးကတော့ နေ့တိုင်းလိုလိုကို ချနေတာ။ ရွာတိုင်းလိုလို အခုပြည်သူတွေ တော်တော်များများက ရွာတွေထဲဆို မနေရဲကြတော့ဘူး။ ထွက်နေရတဲ့ အနေအထား ဖြစ်နေတာ။ ရွာတွေထဲကိုပဲ ချနေတာ ဒရုန်းဗုံးသီးတွေက”
ဒရုန်းဗုံး ကြဲချမှုကြောင့် သေဆုံးသူနဲ့ ထိခိုက်ဒဏ်ရာရသူရဲ့ နာမည်တွေကိုတော့ ထုတ်ပြန်ချက်ထဲ ဖော်ပြထားတာ မရှိပါဘူး။
ဒါ့အပြင် ကျီးကုန်းရွာကနေ ထွက်လာတဲ့ စစ်တပ်နဲ့ ပျူစောထီး အင်အား ၂၀ ခန့်ဟာ သပိတ်မှောက်ရွာကို မီးရှို့ခဲ့တာကြောင့် နေအိမ် ၃၇ လုံး မီးလောင်ပျက်စီးခဲ့တယ်လို့လည်း ထုတ်ပြန်ချက်မှာ ဖော်ပြထားပါတယ်။
