ရွှေဖီမြေ၊ ဖေဖော်ဝါရီ ၁၄ ရက်၊ သထုံ
ကရင်အမျိုးသားအစည်းအရုံး- KNU/KNLA ကော်သူးလေ အုပ်ချုပ်နယ်မြေ၊ ဒူးသထူ(သထုံ)ခရိုင် ကျိုက်ထိုမြို့မှာ တိုက်ပွဲ ဖြစ်ပွားတာမရှိပဲ စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့လို့ ဒေသခံ ၃ ဦး ထိမှန်သေဆုံးခဲ့တယ်လို့ KNU က မနေ့ ဖေဖော်ဝါရီ ၁၃ ရက် ညပိုင်းမှာ ထုတ်ပြန်ထားပါတယ်။
မနေ့မနက် ၁၀ နာရီခွဲဝန်းကျင်မှာ ကျိုက်ထိုမြို့နယ် ပိန္နဲကုန်းရွာပတ်ဝန်းကျင်နဲ့ ကျေးရွာ ဘုန်းကြီးကျောင်းကို ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် အရပ်သား ၁၀ ဦးကျော် ထိမှန်ခဲ့ပြီး အဲဒီထဲက ၃ ဦး သေဆုံးခဲ့တယ်လို့ ဖော်ပြထာပြီး သေဆုံးသူရဲ့ အချက်အလက်ကိုတော့ မဖော်ပြထားပါဘူး။
အလားတူ မနေ့ နေ့လယ် ၁၂ နာရီနဲ့ ညနေ ၄ နာရီမှာလည်း ကျိုက်ထိုမြို့နယ် ကျောက်ဖျာကျေးရွာအုပ်စု ကော်ကပ်ရွာထဲ လေကြောင်းနဲ့ ဗုံးကြဲတိုက်ခိုက်ခဲ့တာကြောင့် ကော်ကပ်ရွာစာသင်ကျောင်း အဆောက်အအုံတွေ ထိခိုက်ပျက်စီးခဲ့တယ်လို့ ဖော်ပြထားပါတယ်။
ဒါ့အပြင် ကျိုက်ထိုမြို့နယ် ကော်ကပ်၊ ပိန္နဲကုန်းရွာနဲ့ ဘီးလင်းမြို့နယ် တဂေးလောင်းချောင်းဖျားရွာတို့ကို စစ်တပ်က လေကြောင်းနဲ့ ပေါင် ၅၀၀ ဗုံး ကြဲချတိုက်ခိုက်တာကြောင့် လူထု ထိခိုက်ဒဏ်ရာရတာနဲ့ သေဆုံးတာတွေ ရှိခဲ့တယ်လို့ ဆိုပါတယ်။
၂၀၂၄ ခုနှစ် ဒီဇင်ဘာ ၃၀ ရက်ကစပြီး စစ်တပ်က သထုံခရိုင်ထဲရှိ စာသင်ကျောင်း၊ ခရစ္စယာန်ဘုရားကျောင်း၊ ဘုန်းကြီးကျောင်း၊ စေတီပုထိုးနဲ့ လူထုနေအိမ်တွေကို ပစ်မှတ်ထားပြီး လေကြောင်းနဲ့ အကြိမ်ကြိမ် ဗုံးကြဲတိုက်ခိုက်ခဲ့တယ်လို့ ထုတ်ပြန်ချက်ထဲ ဖော်ပြထားပါတယ်။
