ခိုင်လေး၊ ဇန်နဝါရီ ၄ ရက်၊ ငဖဲ
မကွေးတိုင်း ငဖဲမြို့နယ် မျှော်စင်ရွာ အနောက်ဘက် နတ်ရေကန် လေကြောင်းရန်ကာကွယ်ရေး ရေဒါစခန်းကနေ ဆိုင်ကယ် ၃ စီးနဲ့ ကင်းလှည့်ဖို့ ထွက်လာတဲ့ စစ်တပ်ကို PRF-Magway က ခြုံခိုတိုက်ခိုက်ရာ စစ်သား ၃ ဦး သေဆုံးပြီး ၁ ဦး ဒဏ်ရာ ရခဲ့တယ်လို့ PRF-Magway မှ ပြန်ကြားရေး တာဝန်ခံတစ်ဦးက ရွှေဖီမြေကို ပြောပါတယ်။
မနေ့ ဇန်နဝါရီ ၃ ရက် ညနေ ၅ နာရီမှာ ဆိုင်ကယ် ၃ စီးနဲ့ မျှော်စင်ရွာ အနောက်ဘက် မီတာ ၂၀၀ ခန့်အကွာမှာ ကင်းလှည့်ဖို့ ထွက်လာတဲ့ စစ်တပ်နဲ့ ၁၀ မိနစ်ကြာ တိုက်ခိုက်မှုဖြစ်ပွားခဲ့တယ်လို့ ဆိုပါတယ်။
“သတင်းရလို့ စောင့်ကြို တိုက်ခိုက်ခဲ့တာပါ။ ဆိုင်ကယ် ၃ စီး ရန်သူ ၆ ယောက်ပါ။ တစ်စီးကို မီတာ ၁၀၀ လောက်စီ ကွာပြီး လာတာပါ။ ရန်သူကနေပြီးတော့ MA-3 လက်နက်ငယ် ၁ လက် သိမ်းဆည်းရမိပါတယ်။ ကျနော်တို့ဘက်ကတော့ ထိခိုက်မှု မရှိပါဘူးဗျ”
ပြီးခဲ့တဲ့ ၂၀၂၄ ဒီဇင်ဘာ ၁၈ ရက်မှာ အမ်း-ပဒါန်းဘက် စစ်ကူသွားတဲ့ စစ်ကား ၄ စီးနဲ့ ကားသေး ၁ စီးကို မိုင်းဆွဲတိုက်ခိုက်ခဲ့ရာ စစ်ကားတစ်စီး ပျက်စီးကာ စစ်သား ၄ ဦး သေဆုံးပြီး ၁၃ ဦး ဒဏ်ရာ ရခဲ့ပါတယ်။
နိုဝင်ဘာ ၂၉ ရက်မှာ စစ်သား ၁ ဦး၊ ဒီဇင်ဘာ ၂၆ ရက်မှာ ၃ ဦး စုစုပေါင်း ၄ ဦးကို လူထုတော်လှန်ရေး မဟာမိတ် အင်အားစု- (PRF-Magway)က ဖမ်းဆီးထိန်းသိမ်းထားတယ်လို့ ဆိုပါတယ်။
