ခိုင်လေး၊ ဖေဖော်ဝါရီ ၂၂ ရက်၊ မိုးမိတ်
တအာင်းတပ်မတော်- TNLA ထိန်းချုပ်ထားတဲ့ မိုးမိတ်မြို့ နယ် ဝဲပေါင်းရွာကို တိုက်ပွဲဖြစ်ပွားတာမရှိဘဲ စစ်တပ်က ဗုံးကြဲတိုက်ခိုက်ခဲ့တာကြောင့် အသက်မပြည့်သေးတဲ့ ကလေးငယ်အပါအဝင် ၃ ဦး သေဆုံးပြီး ၉ ဦး ဒဏ်ရာ ရခဲ့တယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဖေဖော်ဝါရီ ၂၀ ရက် ည ၈ နာရီမှာ ဝဲပေါင်းရွာက စာသင်ကျောင်းကို စစ်တပ်က ပေါင် ၂၀၀ ဗုံးနဲ့ ကြဲချတိုက်ခိုက်ခဲ့တာဖြစ်ပြီး စာသင်ကျောင်းအနီးနားက နေအိမ်တွေလည်း ထိခိုက်ပျက်စီးခဲ့တယ်လို့ သိရပါတယ်။
မြေပြင်အခြေအနေ သိရှိသူတစ်ဦးက “၃ ဦးသေတယ်လို့ သိရတယ်။ ဒဏ်ရာရ ဆေးရုံရောက်တဲ့သူက များတယ်။ ငါးလသား အရွယ် ကလေးအမေက ပွဲချင်းပြီး သေတယ်။ ကလေးက ဘာမှမဖြစ်ဘူး။ ဗုံးစ မှန်လို့ ကျွဲတစ်ကောင်လည်း သေတယ်” ဆိုပြီး ရွှေဖီမြေကို ပြောပါတယ်။
တိုက်ပွဲဖြစ်ပွားတာ မရှိသလို အနီးနားမှာလည်း စခန်းချနေထိုင်တဲ့ လက်နက်ကိုင်အဖွဲ့အစည်း မရှိတာကြောင့် ဒီလုပ်ရပ်တွေက ဒေသခံတွေကို ပစ်မှတ်ထား တိုက်ခိုက်တာလို့လည်း ၎င်းက ဆိုပါတယ်။
တအာင်းတပ်မတော်- TNLA နဲ့ စစ်ကောင်စီရဲ့ ကူမင်းဆွေးနွေးပွဲအပြီးမှာ စစ်တပ်က TNLA ထိန်းချုပ်ထားတဲ့ နောင်ချိုနဲ့ မိုးမိတ်မြို့နယ်ကို ဗုံး ကြဲလာတာဖြစ်ပြီး ဖေဖော်ဝါရီ ၁၉ ရက်ကနေ ဒီနေ့ ၂၂ ရက်အထိ ၄ ရက်အတွင်း အသက်မပြည့်သေးတဲ့ ကလေးငယ်အပါအဝင် ဒေသခံ ၈ ဦး သေဆုံးခဲ့ပါတယ်။
