ရဲမာန်၊ စက်တင်ဘာ ၂၄ ရက်၊ မတ္တရာ
မန္တလေးတိုင်း မတ္တရာမြို့နယ် အရှေ့ခြမ်းကို စစ်ကောင်စီတပ်က လက်နက်ကြီး ရမ်းသမ်းပစ်ခတ်မှုတွေ ပြုလုပ်ခဲ့တာကြောင့် မိသားစုဝင် ၃ ဦး ထိမှန်ပြီး အဲထဲက ၁ ဦးကတော့ သေဆုံးသွားပါတယ်။
ရုံးပင်ရွာအနီးကို စစ်ကောင်စီတပ်က မနေ့ စက်တင်ဘာလ ၂၃ ရက် ည ၄ နာရီဝန်းကျင်မှာ လက်နက်ကြီး ရမ်းသမ်းပစ်ခတ်ခဲ့တာဖြစ်ပြီး အမျိုးသမီးတစ်ဦး သေဆုံးသွားခဲ့တာ ဖြစ် ပါတယ်။
“ကျောက်တံတား ဘိုကုန်းကျောင်းတစ်ဝိုက်ကနေ ပစ်တာ။ အဲဘက်မှာ တိုက်ပွဲဖြစ်တယ်တော့ မကြားပါဘူး။ လက်နက်ကြီးနဲ့ ရမ်းသမ်းပစ်တာပါ” လို့ ဖြစ်စဉ်သိရှိသူတစ်ဦးက ရွှေဖီမြေကို ပြောပါတယ်။
၎င်းပစ်ခတ်မှုကြောင့် သေဆုံးခဲ့ရသူကတော့ အသက် ၃၅ နှစ်အရွယ်ရှိ ဒေါ်အေးအေးမော်ဖြစ်ပြီး ဒဏ်ရာရသွားသူကတော့ ကိုသိန်းထွေးနဲ့ သမီးဖြစ်သူတို့ ဖြစ်ပါတယ်။
ပြီးခဲ့ စက်တင်ဘာ ၁၆ ရက် နေ့လယ် ၂ နာရီခွဲမှာလည်း ဥက္ကံနဲ ဒီယာရွာတွေကို စစ်ကောင်စီတပ်က ဂျက်ဖိုက်တာနဲ့ ဗုံးကြဲခဲ့တာကြောင့် အရပ်သား ၆ ဦး သေဆုံးခဲ့ပြီး ၁ ဦး ဒဏ်ရာရရှိခဲ့ပါတယ်။
ပြီးခဲ့တဲ့ စက်တင်ဘာ ၁၃ ရက်မှာလည်း သပိတ်ကျင်းမြို့နယ် ကျောက်ဖြာနဲ့ ညောင်ပင်သာရွာကို Y-12 လေယာဉ်နဲ့ ဗုံးသီး ၄၀ ကြဲချတိုက်ခိုက်ခဲ့တာကြောင့် ကလေးငယ် ၂ ဦးအပါအဝင် ၇ ဦး သေဆုံးခဲ့ပြီး ၄ ဦး ဒဏ်ရာ ရခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
