မိုင်းရူပ၊ မတ်လ ၂၉ ရက်၊ အောင်ပန်း
ရှမ်းတောင် ကလောမြို့နယ် အောင်ပန်းမြို့မှာ ငလျင် လှုပ်ခတ်မှုကြောင့် သေဆုံးသူ ၃ ဦးရဲ့အလောင်း တွေ့ရှိထားပြီး ၂၄ ဦးကို အသက်ရှင်လျက် ကယ်ထုတ်နိုင်ခဲ့တယ်လို့ ကယ်ဆယ်ရေး လုပ်နေသူတွေက ရွှေဖီမြေကို ပြောပါတယ်။
မနေ့ မတ်လ ၂၈ ရက် ငလျင် လှုပ်ခတ်မှုမှာ ဟိုတယ်အောင်ပန်း ပြိုကျခဲ့ပြီး ဒီနေ့ မတ်လ ၂၉ ရက် မနက်ပိုင်းအထိ သေဆုံးသူ အမျိုးသမီးအလောင်း ၃ လောင်း တွေ့ရှိထားပြီး အသက်ရှင် ကျန်ရစ်သူ ၂၄ ဦးကို ကယ်ထုတ်နိုင်ခဲ့တယ်လို့ ဆိုပါတယ်။
“အလောင်း ၃ လောင်းပဲ ရသေးတယ်ဗျ။ အမျိုးသမီးတွေပဲ။ ၂၄ ယောက်က အသက်ရှင်လျက် ကယ်ထုတ်နိုင်ခဲ့တယ်။ အောင်ပန်းမှာက အဲဟိုတယ်ပဲ ထိခိုက်မှု ရှိတယ်။ မြို့ထဲမှာတော့ အုတ်တံတိုင်းတွေ ပျက်တာရှိတယ်” လို့ ကယ်ဆယ်ရေး လုပ်နေတဲ့ အောင်ပန်း လူမှုကူညီရေးအဖွဲ့ရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
ဒီနေ့အထိ မီးသတ်တပ်ဖွဲ့အပါအဝင် လူမှုကူညီရေးအဖွဲ့က ကယ်ဆယ်ရေး ဆက်လုပ်နေပြီး ထိခိုက်သေဆုံးသူတွေကို ဆက်လက်ရှာဖွေနေတယ်လို့ သူက ဆက်ပြောပါတယ်။
ဒီနေ့လယ် ၁ နာရီဝန်းကျင်ကစပြီး နိုင်ငံတစ်ဝန်းမှာ ငလျင်လှုပ်ခတ်မှု ဖြစ်ပွားခဲ့ပြီး သေဆုံးသူ ထောင်ချီ ရှိနေပြီး ဒီနေ့မနက်ပိုင်းအထိ စစ်ကောင်စီရဲ့ ထုတ်ပြန်ချက်အရ မန္တလေးတိုင်းမှာ သေဆုံးသူ ၁ ထောင်ကျော်၊ ဒဏ်ရာရရှိသူ ၁,၆၇၀ ဦး၊ ပျောက်ဆုံးနေသူ ၆၈ ဦး ရှိနေပြီး သေဆုံးသူရဲ့ စာရင်းတွေကို ဆက်လက် ကောက်ယူနေပြီး အရေအတွက် ထပ်တိုးလာနိုင်ပါတယ်။
ငလျင်ကြောင့် ထိခိုက်မှုများတဲ့ မန္တလေး၊ စစ်ကိုင်း၊ မကွေး၊ ပဲခူးတိုင်း၊ ရှမ်းပြည်နယ် အရှေ့မြောက်ပိုင်းနဲ့ နေပြည်တော်ကောင်စီနယ်မြေတွေကို စစ်ကောင်စီရဲ့ အမျိုးသားသဘာ၀ဘေးအန္တရာယ်ဆိုင်ရာ စီမံခန့်ခွဲမှုကော်မတီက အရေးပေါ်အခြေအနေ ကြေညာထားပါတယ်။
