မိုင်းရူပ၊ ဇန်နဝါရီ ၁၈ ရက်၊ ညောင်ရွှေ
ရှမ်းတောင် ညောင်ရွှေမြို့နယ်ရှိ စစ်ရှောင်စခန်းတစ်ခုမှာ စစ်ကောင်စီတပ်နဲ့ ပအိုဝ်းပြည်သူ့စစ် PNO ရဲ့ လက်နက်ကြီးကြောင့် အရပ်သား ၃ ဦး သေဆုံးပြီး ၁၄ ဦး ဒဏ်ရာရခဲ့တယ်လို့ အင်းလေးဒေသ လူ့အခွင့်အရေးဆီက သိရပါတယ်။
မနေ့ ဇန်နဝါရီ ၁၇ ရက် နေ့လယ် ၁ နာရီ ၄၀ မိနစ်မှာ ညောင်ရွှေမြို့နယ် ဘုရားတောင်လွယ်နွဲ့ရှိ စစ်ရှောင်စခန်းကို စစ်တပ်နဲ့ PNO က လက်နက်ကြီး ပစ်ခတ်ခဲ့ရာ အသက် ၆ နှစ်အရွယ်ကလေးတစ်ဦးအပါအဝင် ၃ ဦး သေဆုံးပြီး ၁၄ ဦး ဒဏ်ရာ ရခဲ့ပါတယ်။
“အခုဆိုရင် ဘုရားတောင်ရွာက ဘာတိုက်ပွဲမှလည်း မဖြစ်ဘူး။ အရပ်သားပြည်သူတွေကို လက်နက်ကြီး ရမ်းသမ်းပစ်ခတ် တိုက်ခိုက်တာပါ။ အခုလုပ်ရပ်ဆို စကစနဲ့ ပအိုဝ်းပြည်သူ့စစ်က ပြည်သူအပေါ် ရက်ရက်စက်စက် ကျူးလွန်နေတာ” လို့ အင်းလေးဒေသ လူ့အခွင့်အရေး တာဝန်ရှိသူတစ်ဦးက ရွှေဖီမြေကို ပြောပါတယ်။
သေဆုံးသွားတဲ့ စစ်ရှောင်နဲ့ ဒဏ်ရာရသူတွေဟာ ညောင်ရွှေမြို့နယ် ရေပူရွာခံဖြစ်ပြီး ဒဏ်ရာရသူကိုတော့ ညောင်ရွှေမြို့နယ် စံကားဆေးရုံမှာ ကုသနေတယ်လို့ သူက ဆက်ပြောပါတယ်။
အာဏာသိမ်းပြီးနောက်ပိုင်း စစ်တပ်ဟာ နိုင်ငံတဝန်းမှာ လူသားမဆန်တဲ့ လုပ်ရပ်ကို အရပ်သားတွေအပေါ် ရည်ရွယ်ချက်ရှိရှိ လုပ်ဆောင်နေတာဖြစ်တယ်လို့ ဆိုပါတယ်။
စစ်တပ်နဲ့ PNO တပ်ဘက်ကတော့ ညောင်ရွှေမြို့နယ် လက်နက်ကြီးကြောင့် စစ်ရှောင်တွေ သေဆုံးခဲ့ရတာနဲ့ ပတ်သက်ပြီး တစ်စုံတစ်ရာ တုန့်ပြန်ထားတာ မရှိသေးပါဘူး။
ရှမ်းတောင်က တိုက်ပွဲကြောင့် ပအိုဝ်းလူမျိုး အများဆုံး နေထိုင်တဲ့ ညောင်ရွှေမြို့နယ်အပါအဝင် မြို့နယ် ၇ ခုမှာ စစ်ဘေးရှောင်နေတဲ့ ဒေသခံ ၆ သောင်းခွဲအထိ ရှိနေပြီး အရေးပေါ်အကူအညီ လိုအပ်နေတယ်လို့ ပအိုဝ်းလူငယ်အစည်းအရုံး- PYO ရဲ့ တာဝန်ရှိသူတစ်ဦးက ပြောပါတယ်။
