အိုက်ပွီး၊ မေလ ၁၄ ရက်၊ ကျောက်တော်
အာရက္ခတပ်တော်(AA) ထိန်းချုပ်ထားတဲ့ ရခိုင်ပြည်နယ်၊ ကျောက်တော်မြို့ လေကြောင်း ဗုံးကြဲတိုက်ခိုက်မှုမှာ အရပ်သား အမျိုးသမီး ၃ဦးသေဆုံးပြီး ၅ ဦး ထိခိုက်ဒဏ်ရာရရှိခဲ့တယ်လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
ဒီနေ့ မေလ ၁၄ ရက်နေ့၊ ညနေ ၃ နာရီ ၅ မိနစ်ဝန်းကျင်မှာ ကျောက်တော်မြို့၊ မြို့မရပ်ကွက်ကို စစ်ကောင်စီက ပေါင် ၅ ဗုံးသီး ၁လုံးနဲ့ လေကြောင်း ဗုံးကြဲတိုက်ခိုက်တဲ့အပြင် ရော့ကတ်နဲ့ပါ ပစ်ခတ်ခဲ့တဲ့အတွက် အရပ်သားထိခိုက်သေဆုံးခဲ့တာ ဖြစ်ပါတယ်။
“အရပ်သားတွေ နေတဲ့နေရာကို ညနေက ဗုံးသီး တစ်လုံးကြဲသွားတာပါ။ ကလေးတစ်ယောက်က ပွဲချင်းပြီး သေဆုံးတယ်။ ကျန်တဲ့အမျိုးသမီး နှစ်ယောက်က ပြင်းထန်ဒဏ်ရာနဲ့ ဆုံးသွားတယ်။ ၅ ယောက် ဒဏ်ရာရတယ်။ အခု ဆေးကုသမှုပြုလုပ်နေတယ်။”လို့ မြေပြင်ဒေသခံတစ်ဦးက ရွှေဖီမြေသို့ ပြောပါတယ်။
သေဆုံးတဲ့ အမျိုးသမီး ၃ ဦးထဲမှာ အသက် ၁၀ နှစ်အရွယ် မိန်းကလေးငယ် စစ်ဘေးရှောင်တစ်ဦးလည်းပါဝင်ပြီး သူဟာ စစ်တွေမြို့နယ်၊ ဗျိုင်းဖြူရွာကနေ မိဘတွေနဲ့အတူ ကျောက်တော်မြို့ကို လာရောက်တိုက်ပွဲရှောင်နေတာဖြစ်ပါတယ်။
ဒါ့အပြင် ဒီနေ့ညနေ လေကြောင်း ဗုံးကြဲတိုက်ခိုက်တဲ့အတွက် မြို့မရပ်ကွက်က အရပ်သား လူနေအိမ် ၅ လုံးထက်မနည်း ဗုံးထိမှန် ပျက်စီးသွားတယ်လို့ သိရပါတယ်။
“ဗုံးသီးကျတဲ့နေရာ အနီးတစ်ဝိုက်က နေအိမ် ၅ လုံးလောက်က ပျက်စီးသွားပါတယ်။ အဲထဲမှာ ၃ အိမ်လောက်က လုံးဝ ပျက်စီးသွားပါတယ်။ ရော့ကတ်နဲ့ပစ်ခတ်တဲ့ဟာတွေကျတော့ အနည်းကျဥ်း အိမ်တွေ ပျက်စီးတာတွေလည်း ရှိပါသေးတယ်။”လို့ မြေမြင်ဒေသခံတစ်ဦးက ရွှေဖီမြေသို့ ပြောပါတယ်။
မနေ့ မေလ ၁၃ ရက် နံနက် ၁၀ နာရီတုန်းကလည်း ရသေ့တောင်မြို့နယ်၊ ထွန်းရဝေရွာဟောင်းကို စစ်ကောင်စီ ဗုံးကြဲတိုက်ခိုက်တာကြောင့် ကလေးအပါအဝင် ရပ်သား ၁၃ ဦးသေဆုံးခဲ့ပါတယ်။
