မြတ်နိုး၊ ဖေဖော်ဝါရီ ၂၄ ရက်၊ လိုင်ဇာ
ကချင်ပြည်နယ် လိုင်ဇာအနီး ဂျဲယန် စစ်ရှောင်စခန်းက ကလေး ၃ ဦး ပျောက်ဆုံးနေကြောင်း ဒေသခံတွေဆီက သိရပါတယ်။
“ဂျဲယန် ရပ်ကွက် ၆ က ကလေးမလေး ၃ ယောက် ဂေါက်ကွင်းဘက် လမ်းလျှောက်သွားတာ အခုထိ(ဖေဖော်ဝါရီ ၂၃ ရက်) ပြန်မရောက်လာဘူး။ ပျောက်နေတယ်။ အခုထိ မတွေ့သေးဘူး” လို့ ဒေသခံ အမျိုးသမီးတစ်ဦးက ပြောပါတယ်။
ကလေးမလေးတွေက အသက် ၁၁ နှစ်၊ ၁၂ နှစ်ဝန်းကျင်လောက်ပဲ ရှိသေးတယ်လို့ သူက ပြောပါတယ်။
ပျောက်ဆုံးနေတဲ့ ကလေးတွေက ဆွတ်ဆိုင်းအိန်၊ ရွယ်ဆိုင်နဲ့ ဂျီးဆန်မိုင်တို့ဖြစ်ပြီး မိဘတွေ စိတ်ပူေနတာကြောင့် လိုက်ရှာနေဆဲ ဖြစ်ပြီးတော့ တွေ့မိသူတွေအနေနဲ့ အကြောင်းကြားပေးစေလိုတယ်လို့ ပြောဆိုပါတယ်။
ကလေးမိဘတွေက အနီးအနား ရွာတွေ အထိ နေရာအနှံ့ ရှာနေဆဲ ဖြစ်တယ်လို့ ဒေသခံ အမျိုးသားတစ်ယာက်က ပြောပါတယ်။
“အဲဒီ ကလေးတွေ ပျောက်တာ အခုထိ မတွေ့သေးဘူး။ ပျောက်တာ ၃ ရက် ရှိပြီတဲ့။ တွေ့မိတဲ့သူတွေ ကျေးဇူးပြုပြီး အကြောင်းကြားပေးကြဖို့ ပြောလာတယ်။ မိဘတွေ ကျနော်တို့ နေတဲ့နေရာဘက်အထိ လိုက်ရှာနေကြတယ်။ ရောင်းစားခံရတာလား၊ ဘယ်လိုလဲဆိုတာ မသိရလို့ အသည်းအသန် လိုက်ရှာနေတယ်။ ဂျဲယန် စစ်ရှောင်စခန်းက ဟုတ်တယ်။ နေရာ အတော်နှံ့အောင် ရှာပြီးပြီ မတွေ့သေးဘူး ပြောတယ်။ အရမ်း စိတ်ပူနေကြတယ်”
ကလေး ၃ ဦးစလုံးက ကျောင်းတက်နေတာ ဖြစ်ပြီး ကျောင်းဘက်လည်း ရောက်မလာကြဘူးလို့ သူက ပြောပါတယ်။
အဲဒီကလေးတွေ လမ်းလျှောက်သွားတဲ့ ရှေ့မှာ ကား ၁ စီး ဖြတ်လာတာ တွေ့လိုက်ပေမဲ့ အဲဒီကားက ကောက်တင်သွားသလားဆိုတာတော့ သေသေချာချာ မသိရဘူးလို့ ဆိုပါတယ်။
တရုတ်နိုင်ငံဘက် ရောင်းစားခံရမှာကိုလည်း ကလေးမိဘနဲ့ ဒေသခံကပါ စိုးရိမ်နေကြတယ်လို့ ဒေသခံတွေက ပြောပါတယ်။
