ခိုင်လေး၊ ဇန်နဝါရီ ၃၁ ရက်၊ နွားထိုးကြီး
မန္တလေးတိုင်း နွားထိုးကြီးမြို့နယ် ပြင်စည်ရွာကနေ ထွက်လာတဲ့ စစ်ကောင်စီ စစ်ကြောင်း တပ်မ ၉၉ ကို နွားထိုးကြီး PDF ပူးပေါင်းအဖွဲ့က တိုက်ခိုက်ရာ စစ်သား ၂၁ ဦး သေဆုံးပြီး စစ်သုံ့ပန်း ၈ ဦးကို အရှင်ဖမ်းမိခဲ့တယ်လို့ နွားထိုးကြီး PDF မှ တာဝန်ရှိသူတစ်ဦးက ရွှေဖီမြေကို ပြောပါတယ်။
မနေ့ ဇန်နဝါရီ ၃၀ ရက်က မြတောင်နဲ့ စိန်ပန်းကန်ရွာကြား နွားထိုးကြီး PDF ပူးပေါင်းအဖွဲ့မှ ဗိုလ်မှူး ရန်လင်းအောင်နဲ့ ဗိုလ်ကြီး အောင်ဇော်မင်း ဦးစီးတဲ့ တပ်မ ၉၉ လက်အောက်ခံ ခမရ ၁၄၊ ၁၅ နဲ့ ရဲတပ်ရင်း ပူးပေါင်းအင်အား ၅၀ ခန့် ပါတဲ့ စစ်ကြောင်းကို ကြားဖြတ် တိုက်ခိုက်ခဲ့တယ်လို့ ဆိုပါတယ်။
“ပြင်စည်ရွာကနေ အင်အား ၅၀ နဲ့ ထွက်လာတဲ့ စစ်ကြောင်းကို ကျနော်တို့ မနက်ခင်း ၁၀ နာရီခွဲဝန်းကျင်ကနေ နေ့လယ် ၂ နာရီဝန်းကျင်လောက်အထိ ထိတွေ့မှု ဖြစ်ပွားခဲ့တာပါ။ ကျနော်တို့ဘက်က ထိခိုက်ဒဏ်ရာ ရတာ မရှိပါဘူး”
စစ်တပ်ဘက်က ဗိုလ်ကြီး အောင်ဇော်မင်းအပါအဝင် အလောင်း ၂၁ လောင်း ရရှိပြီး ဗိုလ်မှူး ရန်လင်းအောင်က ထိခိုက်ဒဏ်ရာနဲ့ဆုတ်ခွာရင်း သေဆုံးသွားတယ်လို့ အမှတ် ၁ စစ်ဒေသရဲ့ သတင်းဖော်ပြချက်အရ သိရပါတယ်။
တိုက်ပွဲအတွင်း MA-1 ၃ လက်၊ MA-2 ၄ လက်၊ MA-3 ၆ လက်၊ MA-4 ၂ လက်၊ MA-5 ၁ လက်၊ MA-11 ၆ လက်၊ G-3 ၁၂ လက်၊ G-4 ၂ လက်၊ BA-94 ၁ လက်၊ ၆၀ မမ ပြောင်းတို ၁ လက်၊ ပြောင်းရှည် ၁ လက်နဲ့ ၆၀ မမ ဗုံးသီး ၂၉ လုံး၊ အီနာဂါ ၅ လုံး၊နာနတ်သီးဗုံး ၉ လုံး၊ ၉ မမ ကျည် ၃၀၅ တောင့်၊ ဦးထုပ် ၁၀ လုံးကို သိမ်းဆည်းရမိခဲ့တယ်လို့ ဆိုပါတယ်။
တိုက်ခိုက်မှုအတွင်း မြင်းခြံခရိုင် တပ်ရင်း ၄ နဲ့ ၁၀ က ပူးပေါင်းလုပ်ဆောင်ခဲ့တာကြောင့် စစ်တပ်ဘက် တံတားဦးလေတပ်ကနေ တက်လာတဲ့ Mi-35 ၁ စီးနဲ့ ၃ ကြိမ် လာရောက် ပစ်ကူပေးခဲ့တယ်လို့လည်း နွားထိုးကြီး PDF ရဲ့ ထုတ်ပြန်ချက်မှာ ဖော်ပြထားပါတယ်။
