မိုင်းပန်ပျော်၊ ဇန်နဝါရီ ၄ ရက်၊ နမ့်ဆန်
တအာင်းတပ်မတော်- TNLA ထိန်းချုပ်ထားတဲ့ နမ့်ဆန်မြို့နယ် မြို့သစ်ကျေးရွာက နေအိမ်တစ်အိမ်မှာ မူးယစ်ဆေးဝါး ရောင်းဝယ်ဖောက်ကားတယ်ဆိုတဲ့ စွပ်စွဲချက်နဲ့ TNLA တပ်သား ၂ ဦးက ငွေ သိန်း ၁၀၀ တောင်းခံခဲ့ကြောင်း စုံစမ်းသိရှိရပါတယ်။
ငွေတောင်းခံတဲ့ အဲဒီတပ်သား ၂ ဦးဟာ နောင်ချိုမြို့နယ် တောင်းခမ်း တိုက်ပွဲကနေ ပြန်လာကြသူဖြစ်ပြီး ပြီးခဲ့တဲ့ ၂၀၂၄ ခုနှစ် ဒီဇင်ဘာလ တတိယအပတ်လောက်မှာ မြို့သစ်ရွာက အဲဒီနေအိမ်တစ်အိမ်မှာ အခုလို ငွေတောင်းခံခဲ့တာ ဖြစ်ပါတယ်။
“သူတို့က ဒဏ်ရာရတဲ့ စစ်သားတွေ။ တောင်းခမ်းကနေ ပြန်လာတာ။ သူတို့ RPG တစ်လုံး ပါတယ်။ အဲမှာ ထားခဲ့မယ်။ နောက်သုံးရက် ပြန်လာယူမယ် ပြောပြီးတော့ အဲအိမ်မှာ ထားခဲ့တယ်လို့ ပြောတယ်။ သူတို့ထားတဲ့ ရက်ကတော့ ၁၅၊ ၁၆ လောက် ကျမှာပေါ့နော်။ ၁၉ ရက်နေ့ သူတို့ပြန်လာတာ။ ပြန်လာတဲ့အချိန် သူတို့ပစ္စည်း မဟုတ်ဘူးတဲ့။ မင်းတို့ လက်နက်တွေ ထားတယ်။ မူးယစ် အရောင်းအဝယ် လုပ်တယ်ဆိုပြီး အဲလိုခြိမ်းခြောက်စကား ပြောပြီးတော့ မင်းတို့ ပိုက်ဆံ ပေးရမယ်။ သိန်း ၁၀၀ ပေးရမယ်။ အဲလိုပြောတာ” လို့ မြို့သစ်ရွာခံ အမျိုးသားတစ်ဦးက ပြောပါတယ်။
တောင်းခံတဲ့ သိန်း ၁၀၀ ကို အိမ်ရှင်က မပေးနိုင်တာကြောင့် ညှိနှိုင်းရာကနေ နောက်ဆုံး ၂၅ သိန်း ပေးခဲ့ရတယ်လို့ ဆိုပါတယ်။
အဲဒီနောက် ဒီဇင်ဘာ ၂၄ ရက်မှာ TNLA ရဲ့ အဲဒီတပ်သား ၂ ဦးက ငွေ ထပ်တောင်းဖို့ ပြန်လာချိန်မှာ မြို့သစ်ရွာက လူငယ်တွေက ဝိုင်းဝန်းဖမ်းဆီးပြီး ကျောက်မဲမြို့နယ် မိုင်းငေါ့မြို့က TNLA ရဲ့ ရဲတပ်ဖွဲ့ထံ လွှဲအပ်ပေးခဲ့တယ်လို့ သိရပါတယ်။
၎င်းတို့ကို ဘယ်လို အရေးယူမလဲဆိုတာနဲ့ ပတ်သက်ပြီး TNLA ရဲ့ ပြောရေးဆိုခွင့်ရှိသူ လွေးယေဦးကို ဆက်သွယ်မေးမြန်းထားပေမဲ့ ပြန်လည်ဖြေကြားတာတော့ မရှိသေးပါဘူး။
ပြီးခဲ့တဲ့ ဒီဇင်ဘာ ၂၅ ရက်တုန်းကလည်း ရှမ်းပြည်နယ်မြောက်ပိုင်း မဟာမိတ်တပ်ရင်း- NSSAA က မန္တလေးတိုင်း မိုးကုတ်မြို့မှာ ဖမ်းဆီးရမိတဲ့ ငွေကြေးလိုက်လံ လိမ်လည်နေသူ ၉ ဦးထဲ TNLA ရဲ့ ရပ်ရွာလုံခြုံရေးအဖွဲ့ ၃ ဦး ပါဝင်ပါတယ်။
